Polshada qo‘poruvchilikda gumonlangan to‘rt kishi qo‘lga olindi

Polshada xalqaro xarakterdagi sabotaj va portlovchi guruh faoliyatida ishtirok etgan to‘rt kishi hibsga olindi. Bu haqda mamlakat milliy prokuraturasi matbuot xizmati xabar berdi.

Ta’kidlanishicha, qo‘poruvchilik guruhi portlovchi va xavfli moddalar solingan posilkalarni kurerlik kompaniyalari orqali Yevropa Ittifoqi mamlakatlari va Buyuk Britaniyaga jo‘natish bilan shug‘ullangan, ular yer va havoda tashish vaqtida o‘z-o‘zidan yonib ketgan yoki portlagan.

“Bundan tashqari, jamoaning maqsadi bu turdagi yuklarni uzatish kanalini tekshirish bo‘lib, yakunda Amerika Qo‘shma Shtatlari va Kanadaga jo‘natilgan”, deyiladi xabarda.

Qayd etilishicha, Polsha rasmiylari hozirda ushbu guruh faoliyatiga aloqador shaxslarning to‘liq doirasini, shu jumladan Yevropa Ittifoqining boshqa mamlakatlari huquq-tartibot idoralari bilan hamkorlikda aniqlash bo‘yicha jadal chora-tadbirlarni amalga oshirmoqda.

Prokuratura matbuot bayonotida hibsga olinganlarning shaxsi va fuqaroligi haqida hech qanday ma’lumot yo‘q. Shu bilan birga, 25 oktyabr kuni Polsha Ichki xavfsizlik agentligi (ABW) razvedka xizmatlari joriy yilda mamlakatga, Yevropa Ittifoqi va NATOga a’zo mamlakatlarga qarshi qaratilgan sabotaj harakatlarining kuchayotgani haqida xabar bergan.

”Bunday harakatlar Rossiya maxsus xizmatlari tomonidan tashkil qilinadi va muvofiqlashtiriladi”, deyilgan ABW xabarida.

Razvedka xizmati ma’lumotlariga ko‘ra, 2024 yilda Rossiya maxsus xizmatlari ko‘rsatmasi bo‘yicha Polsha hududida faoliyat yuritayotgan qo‘poruvchilik guruhlari faoliyati oshgan. Asosiy nishonlar fuqarolik ob’ektlari, jumladan, omborlar va yirik do‘konlar bo‘lgan, asosiy usul esa o‘t qo‘yish bo‘lgan.

“Rossiya maxsus xizmatlarining topshiriqlarini bajargan shaxslar, xususan, Yevropada kamuflyajlangan yondiruvchi moddalar va tashish paytida yoqib yuborilgan soat mexanizmlari, kurerlik jo‘natmalarini tarqatish bilan shug‘ullangan”, deya ta’kidlaydi razvedka xizmati.

Razvedka ma’lumotlariga ko‘ra, sobiq SSSR davlatlaridan, jumladan Ukraina va Belarusdan ko‘plab yoshlar qo‘poruvchilik missiyalarini bajarish uchun jalb qilinmoqda. 22 oktyabr kuni Polsha Tashqi ishlar vaziri Radoslav Sikorskiy Rossiya tomonining qo‘poruvchilik harakatlari kuchayganini bildirib, Poznandagi Rossiya konsulligini yopayotgani va uning xodimlarini mamlakatda persona non grata deb e’lon qilganini ma’lum qildi.

Eslatib o‘tamiz, avvalroq Polsha Mudofaa vaziri o‘rinbosari Sezariy Tomchik mamlakat “gibrid urush” holatida ekanligini ma’lum qilgandi.