Pezeshkiyon Makron bilan uchrashib, Fransiyaning Isroilni qo‘llashini qoraladi

Kecha, 24 sentyabr kuni Nyu-Yorkda davom etayotgan BMT Bosh Assambleyasi doirasida Fransiya va Eron Prezidentlari Emmanuel Makron va Mas’ud Pezeshkiyon o‘rtasida uchrashuv bo‘lib o‘tdi. Bu haqda ikki davlat rahbarlarining matbuot xizmatlari xabar berdi.

Yelisey saroyi bayonotiga ko‘ra, Emmanuel Makron Mas’ud Pezeshkiyonni Isroil “Hizbulloh”ga zarba berayotgan Livandagi keskinlikni kamaytirish uchun o‘z ta’siridan foydalanishga chaqirgan.

Makronning so‘zlariga ko‘ra, Tehronning tegishli ta’siri G‘azo sektoridagi jangovar harakatlarni tugatish imkonini berishi mumkin.

Bundan tashqari, Makron va Pezeshkiyon Eron yadro dasturini muhokama qilgan. Makron “Eron yadroviy dasturining trayektoriyasidan chuqur xavotir bildirdi” va eronlik mavqedoshini “bu masala bo‘yicha diplomatik yechim”ga erishish uchun MAGATE bilan to‘liq hamkorlikni ta’minlashga chaqirdi.

Shuningdek, Fransiya Prezidenti Tehronni Ukraina mojarosida Rossiyani qo‘llab-quvvatlash va Moskvaga o‘z qurol-yarog‘ini yetkazib berishdan voz kechishga chaqirdi.

Eron Prezidenti matbuot xizmatining yozishicha, Pezeshkiyon Isroil jinoyatlari haqida gapirib, Fransiya ularni to‘xtatishda rol o‘ynashi mumkinligini aytgan. Pezeshkiyonning so‘zlariga ko‘ra, Isroil harakatlarining davom etishi vaziyatni nazoratdan chiqarishi mumkin.

“Mintaqadagi keskinlik va mojaroning oldini olish uchun Islom Respublikasi Isroilga nisbatan o‘zini tutib turdi; ammo rejim G‘azodagi jinoyatlarini og‘irlashtirdi va Livanga hujum qila boshladi”, degan Eron Prezidenti.

Uning so‘zlariga ko‘ra, Eron mintaqada keskinlik va mojarolar kuchayishiga yo‘l qo‘ymaslik uchun Isroil tomonidan Tehronda HAMAS yetakchisi Ismoil Xoniyaning o‘ldirilishiga javoban vazminlik ko‘rsatgan.

"Eron va mintaqa xalqlari sionistik rejim jinoyatlaridan qattiq ta’sirlangan va bu vahshiyliklarning davom etishi vaziyatni nazoratdan chiqarib yuborishi mumkin", deydi Pezeshkiyon.

Shuningdek, u AQSH va ba’zi G‘arb davlatlari, jumladan Fransiyani jinoyatlarni oqlab, ularni rejim tomonidan o‘zini himoya qilish uchun sodir etayotganini da’vo qilgani uchun qoraladi.

"Qo‘shma Shtatlar va Fransiya kabi ba’zi G‘arb davlatlari qonuniy o‘zini himoya qilish deb ta’riflayotgan sionistlarning jinoyatlarini qaysi qoidaga ko‘ra oqlash mumkin? G‘arb davlatlari ikki tomonlama standartlarni qo‘llashni bas qilishi kerak, chunki status-kvo va shunchaki og‘zaki qoralash bayonotlari sionistik rejimga jasorat berdi”, deya qo‘shimcha qildi Pezeshkiyon.

O‘z navbatida, Makron 2022 yilgi tartibsizliklarda ishtirok etgani uchun Eron tomonidan hibsga olingan 3 nafar fransuz fuqarosini ozod qilishga chaqirgan.

Pezeshkiyon esa bir shaxsni himoya qilish uchun yig‘iladigan, lekin G‘azo va Livanda minglab begunoh odamlarning qirg‘in qilinishiga sukut saqlaydigan “inson huquqlari himoyachilari”ni tanqid qilgan.

Shuningdek, Eron Prezidenti uning ma’muriyati ham mamlakat ichida, ham tashqarida birdamlikka intilayotganini, qo‘shni davlatlar bilan konstruktiv hamkorlik siyosatini yuritishini ta’kidladi.

“Biz Eron taraqqiyoti yo‘lidagi to‘siqlarni yengish uchun o‘zaro hamkorlik va muzokaralarga tayyormiz. Biz tinchlik va barcha insoniyat qadr-qimmatini saqlash asosida dunyo qurishga intilamiz. Shunga ko‘ra, biz Yevropa davlatlari bilan hamkorlik qilishga va o‘zaro hamkorlik qilishga tayyormiz”.

U, shuningdek, Eron xalqaro muammolarni, jumladan, Tehronning yadroviy dasturi bo‘yicha muzokaralarga tayyorligini bildirdi.

“Eron hech qachon yadro quroliga ega bo‘lishga intilmagan va bunday qilmaydi. Albatta, biz an’anaviy tarzda mudofaa qobiliyatimizni va oldini olish kuchimizni oshirish ustida ishlayapmiz”, dedi u.

O‘z navbatida, Makron G‘arbiy Osiyoda yuz berayotgan voqealar, xususan, Isroilning Livanning turli qismlariga shiddatli hujumlari yuzasidan xavotir bildirdi.

“Fransiya Livanga qarshi tajovuzni keskin qoraladi va bu hujumlarni to‘xtatish uchun bor kuchini sarfladi”, dedi Makron.

Ma’lumot uchun, bu Mas’ud Pezeshkiyon va Emmanuel Makronning birinchi bor uchrashishi.

Eslatib o‘tamiz, 23 sentyabr kuni Pezeshkiyon Nyu-Yorkdagi Turk uyida Turkiya Prezidenti Rajab Toyib Erdo‘g‘an bilan uchrashgandi.