Pentagon Rossiyani emas, Xitoyni asosiy tahdid deb hisoblaydi – WP 

Oq uyning fikricha, Xitoy hozirda Qo‘shma Shtatlar uchun asosiy tahdid hisoblanishi va Rossiyani jilovlash esa Yevropa ittifoqchilari zimmasiga yuklatilishi kerak. Bu haqda kecha, 29 mart kuni Pentagon rahbari Pit Hegset tomonidan o‘z qo‘l ostidagilarga yuborilgan AQSH Mudofaa vazirligining ustuvor yo‘nalishlari haqidagi ichki sirkulyarga tayanib, “The Washington Post” xabar berdi.

WP tomonidan ko‘rilgan maxfiy hujjat milliy mudofaa bo‘yicha vaqtinchalik strategik qo‘llanmadir. U mart oyi o‘rtalarida Pentagonga tarqatilgan va departamentning yuqori lavozimli amaldorlari uchun ustuvor vazifalar tizimini belgilab beradi.

Pentagonning yirik davlat bilan mumkin bo‘lgan urushga tayyorgarlik ko‘rish uchun kuchlarni rejalashtirish konsepsiyasi faqat Pekin bilan ziddiyatni hisobga oladi. Hujjatga ko‘ra, Moskva tahdidi asosan Yevropa ittifoqchilariga tegishli bo‘lib qoladi.

Qo‘llanmada, shuningdek, Pentagon Yevropa, Yaqin Sharq va Sharqiy Osiyodagi ittifoqchilarni mudofaaga ko‘proq mablag‘ sarflash va Rossiya, Shimoliy Koreya va Eron tahdidlarini oldini olishda yetakchi rol o‘ynashga majbur qilishi aytiladi.

Xitoyga e’tiborni qayta tiklash mintaqada AQSH qo‘shinlarining ko‘payishi va qotib qolgan va yerosti nishonlarini yo‘q qiladigan bombalarga ko‘proq e’tibor berishni o‘z ichiga oladi.

Pentagon, shuningdek, Hind-Tinch okeani mintaqasida AQSH qo‘shinlarini joylashtirishni himoya qilishni kuchaytirish, strategik zaxiralarni yaratish va logistikani yaxshilashga chaqirmoqda.

Maxfiy memorandum, shuningdek, Qo‘shma Shtatlarni “yaqin xorijdagi”, jumladan Grenlandiya va Panama kanalidagi tahdidlardan himoya qilishni ham nazarda tutadi. Bundan tashqari, hujjatda harbiylarga noqonuniy migratsiya va giyohvand moddalar savdosiga qarshi faolroq kurashish bo‘yicha ko‘rsatmalar berilgan.

“Yo‘riqnoma Kongressning milliy xavfsizlik qo‘mitalariga taqdim etildi, u yerda respublikachilar va demokratlar buni chalkash deb ta’rifladi”, dedi ismini oshkor etmagan manba nashrga.

Uning qayd etishicha, hujjat bir vaqtning o‘zida aksariyat davlatlar, jumladan, Yaqin Sharqdan ham qo‘shinlarni olib chiqishni talab qiladi, biroq ayni paytda Tramp ma’muriyati Yamandagi husiylarni jilovlash va Eronga bosim o‘tkazishga e’tibor qaratgan.

“Biz dunyoda harbiy ustunlikni va hamma joyda bo‘lishni xohlaymiz, lekin ayni paytda, hech qayerda bo‘lishni istamaymiz”, deya izoh berdi WP manbasi.