Pekin metrosida poyezdlar to‘qnashib ketdi

Kecha, 14 dekabr kuni Xitoy poytaxti metrosidagi poyezdlarning to‘qnashuvi oqibatida 500 dan ortiq yo‘lovchi jabrlandi, biroq hech kim halok bo‘lmadi. Bu haqda Pekin transport boshqarmasi xabar berdi. 

“Jami 515 kishi tibbiy muassasalarga tibbiy ko‘rikdan o‘tkazish uchun yuborilgan, 102 nafarida esa sinish aniqlangan”, deyiladi transport boshqarmasi saytida e’lon qilingan xabarda.

Boshqarmaning Weibo ijtimoiy tarmog‘idagi sahifasida favqulodda holat Pekin vaqti bilan 18:57 da Xiyerqi va Shengming Kexueyuan stansiyalari (Changping shimoli-g‘arbiy filiali) o‘rtasidagi baland uchastkada sodir bo‘lgani ma’lum qilingan.

Dastlabki tergov natijalariga ko‘ra, qor yog‘ishi oqibatida yo‘llarning muzlashi poyezdning favqulodda tormozlanishiga va to‘xtab qolishiga olib kelgan. Uning ortidan kelayotgan poyezd o‘z vaqtida tormozlay olmay, to‘qnashuvga sabab bo‘lgan.

Bugun, 15 dekabr holatiga ko‘ra, poyezdlar to‘qnashuvidan jabrlanganlarning 67 nafari shifoxonalarda qolmoqda, qolganlarga esa uyiga ruhsat berilgan.

Ma’lumot uchun, Pekinda 13 dekabr kuni kuchli qor yog‘ishi boshlangan, fuqarolar yo‘llar muzlashi va qor bo‘roni haqida ogohlantirilmoqda. Ba’zi temiryo‘l harakati to‘xtatilgan va maktablar yopilgan.