Parij prokuraturasi Marin Le Penga 5 yil qamoq jazosini talab qilmoqda

Parij prokuraturasi Fransiyaning o‘ta o‘ngchi “Milliy birlik” partiyasining parlamentdagi fraksiyasi rahbari Marin Le Penni Yevroparlament mablag‘larini noto‘g‘ri yo‘naltirganlikda ayblab, besh yillik qamoq jazosiga hukm qilishni so‘radi. Bu haqda kecha, 13 noyabr kuni BFMTV xabar berdi.

Agar sud ayblovlarga rozi bo‘lsa, 56 yoshli Le Pen ham 2027 yilda bo‘lib o‘tadigan Fransiya prezidentlik saylovlarida ishtirok eta olmaydi, chunki unga xuddi shu muddatga davlat lavozimlarida ishlash taqiqlanadi.

Prokurorlar partiyani ikki million yevro jarimaga tortishni ham istamoqda. Avvalroq o‘ng qanot siyosatchi Yevroparlamentga 330 ming yevro to‘lashga hukm qilingan edi. Prokuratura advokatlar apellyatsiya shikoyati bilan murojaat qilgan taqdirda ham, davlat lavozimida ishlashni taqiqlash darhol kuchga kirishini talab qildi.

Le Penning o‘zi prokurorlarni “fransuzlarni o‘zlari xohlagan kishiga ovoz berish imkoniyatidan mahrum qilish”da aybladi.

“Men eng kichik qoidabuzarlik yoki eng kichik noqonuniy xatti-harakatga yo‘l qo‘yganimni mutlaqo his qilmayman”, dedi u.

30 sentyabr kuni Parij jinoiy sudida Marin Le Pen boshchiligidagi Fransiyaning o‘ta o‘ngchi “Milliy birlik” rahbariyatiga nisbatan sud jarayoni boshlandi. Le Pen va boshqa 20 dan ortiq partiya vakillari Yevropa Ittifoqi mablag‘larini o‘zlashtirganlikda va Yevroparlament deputatlarining yordamchilarini soxta yollash orqali partiyani yashirincha moliyalashtirganlikda ayblanmoqda. Ushbu ayblov uchun eng ko‘p jazo o‘n yilgacha ozodlikdan mahrum qilishdir. Umumiy zarar deyarli 7 million yevroga baholanmoqda.

Ayblov xulosasiga ko‘ra, “Milliy birlik”dan Yevroparlament deputatlariga yordamchi sifatida yollangan odamlar aslida o‘z Yevropa Ittifoqidagi vakillari uchun emas, balki shaxsan Le Pen yoki uning partiyasi uchun ishlagan. Shunday qilib, Terri Legening "yordamchilari" dan biri partiya asoschisi Jan-Mari Le Penning qariyb yigirma yil davomida qo‘riqchisi bo‘lgan, keyinroq Marin Le Penning qo‘riqchisi bo‘lib ishlagan. Shuningdek, u o‘z faoliyati haqida kitob nashr etdi, unda Yevropa parlamentidagi lavozim haqida hech qanday gap yo‘q.

Yevropa Parlamenti mablag‘larini o‘g‘irlash ishi

2015 yilda Parij prokuraturasi Yevroparlamentdagi “Milliy front” (MF) vakillari 20 ga yaqin xodimni noto‘g‘ri yollaganlikda gumon qilinib, tergov boshlagan edi. Prokuratura bu odamlar Yevroparlamentdan maosh olgani haqidagi ma’lumotni tasdiqladi, garchi aslida ular MFda ishlashda davom etgan.

2018 yilda Yevropa Ittifoqi Adliya sudi Jan-Mari Le Pen va uning sherigi Bryuno Golnish bilan bog‘liq shunga o‘xshash ish bo‘yicha qaror chiqargan edi. O‘shanda sud siyosatchilar Yevroparlamentga yuz minglab yevrolarni qaytarishi kerak degan qarorga keldi.

Ma’lumot uchun, Marin Le Pen 2022 yilda “Milliy birlik” partiyasidan prezidentlikka nomzod sifatida ko‘rsatilgan va saylovning ikkinchi turida mamlakatning amaldagi Prezidenti Emmanuel Makron bilan kurashgan. Saylov natijasiga ko‘ra esa Marin Le Pen 41,45 foiz ovoz to‘plab, mag‘lub bo‘lgan.