Ostin AQSH mudofaa byudjetini 1 trln dollarga oshirishga chaqirdi

AQSH Mudofaa vaziri lavozimini tark etayotgan Lloyd Ostin harbiy xarajatlarni 2026 yil uchun joriy prognozlardan qariyb 50 milliard dollarga oshirishni tavsiya qildi, buning natijasida yaqin yillarda AQSH mudofaa byudjeti bir trillion dollardan oshishi mumkin. Bu haqda “Bloomberg News” bugun, 13 yanvar kuni xabar berdi.

Oq uy boshqaruv va byudjet idorasiga yuborilgan xatning nusxasidagi ma’lumotga ko‘ra, unda Ostin saylangan prezident Donald Trampning ma’muriyatiga besh yillik mudofaa rejasini qoldirishni tavsiya qilgan, unga ko‘ra 2026 yilda unga 926,5 milliard dollar ajratiladi, garchi bu mablag‘ 876,8 milliard dollar bo‘lishi kutilgan edi.

Pentagon rahbari mudofaa byudjeti 2027 moliya yilida 972,8 milliard dollar, 2028 yilda esa 1 trillion dollardan ortiqni tashkil etishi kerakligini aytgan.

“Strategiyamiz talablariga javob berish uchun 2026-2030 moliyaviy yillarida inflyatsiyadan yuqori real o‘sish va barqaror yangi investitsiyalar kerak”, degan Ostin.

“Bloomberg News” ma’lumotlariga ko‘ra, Ostin mudofaa xarajatlarini 2027 va 2030 moliyaviy yillar oralig‘ida AQSH YAIMning taxminan 3 foizini tashkil etishga chaqirdi. Boshqaruv va byudjet idorasi hisob-kitoblariga ko‘ra, 2024 moliya yilida YAIMning 3,2 foizi mudofaaga yo‘naltirilgan.

Lloyd Ostin o‘z maktubida Pentagon moliyalashda Ukraina va Isroilga yordam ko‘rsatilmasligi kerakligini ta’kidlagan. Mudofaa vazirligi rahbariga ko‘ra, xorijiy harbiy yordam qo‘shimcha mablag‘lar hisobidan moliyalashtirilishi kerak.

Tramp Ostinning tavsiyasini qabul qiladimi yoki yo‘qmi, hozircha aniq emas. O‘tgan hafta AQSHning saylangan prezidenti AQSHning NATOdagi ittifoqchilari yalpi ichki mahsulotining besh foizini mudofaaga sarflashlari kerakligini aytgan edi. Bu hozirgi ikki foiz darajasidan sezilarli darajada yuqori.

Eslatib o‘tamiz, avvalroq Vengriya Bosh vaziri Viktor Orban Budapeshtda yil yakunlari bo‘yicha o‘tkazilgan matbuot anjumanida AQSHning saylangan prezidenti Donald Trampning NATO mudofaa xarajatlarini YAIMning 5 foizigacha oshirish taklifi Vengriya uchun halokatli bo‘lishini aytgandi.