Bola o‘g‘irlamoqchi bo‘lgan bog‘cha tarbiyachisi 6 yilga “kesildi”

Qozog‘istonning Olma-Ota shahridagi maktabgacha tarbiya muassasasi tarbiyalanuvchilaridan birini o‘g‘irlashga uringanlikda gumon qilinayotgan tarbiyachi 6 yilga ozodlikdan mahrum qildi. Bu haqda  Nur.kz xabar bermoqda.

Tergov ma’lumotlariga ko‘ra, bolalar bog‘chasida tarbiyachi bo‘lib ishlagan ayol 5 yoshli bolani o‘g‘irlab ketishga uringan, keyin u bola uchun uning ota-onasidan pul talab qilgan. Sudlanuvchi Sayagul Janalik Qozog‘iston Respublikasi Jinoyat kodeksining ikkita moddasi bo‘yicha aybdor deb topilgan.

Bu xatti-harakati uchun sud uni 6 yilga ozodlikdan mahrum qildi. Joriy yilning yozida pul undirish maqsadida bolalar bog‘chasidan bola o‘g‘irlamoqchi bo‘lgan ayol qora ko‘zoynak va shlyapa kiyib, o‘zining kimligini yashirishga uringan. U o‘zini bolaning xolasi deb tanishtirib, bolaning ota-onasi avtohalokatga uchragani, shuning uchun bolani olib ketishga majbur bo‘lgani haqida aytgan. Biroq, bolalar bog‘chasi xodimlari "g‘alati ayol"ga ishonmadi va bolaning onasini chaqirishdi.

Bolaning ota-onasining so‘zlariga ko‘ra, voqeadan bir kun oldin ularga tahdidli xabarlar kelgan. Tergov davomida bolani o‘g‘irlamoqchi bo‘lgan ayol ushbu bolalar bog‘chasida tarbiyachi bo‘lib ishlagani ma’lum bo‘ldi.