Olimpiya o‘yinlarining ilk haftasi qanday o‘tdi? (fotoreportaj)

Fransiyaning Parij shahri mezbonlik qilayotgan yozgi Olimpiya o‘yinlarining dastlabki haftasi juda qizg‘in bahslarga boy bo‘ldi. Futbol bo‘yicha O‘zbekiston sharafini himoya qilishga otlangan Olimpiya jamoasi musobaqaning 1-turida Ispaniyaga qarshi bahs olib borib, 2:1 hisobida mag‘lubiyatga uchradi. Ikkinchi bahsda Misrga qarshi kechadigan o‘yinda ochko olishni umid qilgan Temur Kapadze shogirdlari Nant shahridagi “Bojuar” stadionida 1:0 hisobida imkoniyatni boy berdi. Shu bilan Dominikanga qarshi yana bitta o‘yin qolganiga qaramasdan, ular uchun Parij Olimpiadasi o‘z poyoniga yetdi.

Dzyudo bo‘yicha esa o‘zbekistonlik sportchi Diyora Keldiyorova ham quvonchli, ham tarixiy g‘alabani qayd etdi. Negaki u O‘zbekiston tarixida yozgi Olimpiada bahslarida oltin medal olgan ilk ayol sportchi sifatida tarixga kirdi. Hali shu paytgacha o‘zbekistonlik ayol sportchilardan hech kim bunday muvaffaqiyatga erishmagan edi. Hozirgacha yozgi Olimpiya o‘yinlarida faqat Yekaterina Xilko bronza medalini qo‘lga kiritgan (Pekin-2008, tramplinda sakrash) va ayollar orasida medal olgan yagona sportchi edi. Keldiyorova tarix yozdi.

Hali oldinda bir nechta bahslar kutib turibdi. QALAMPIR.UZ Parij-2024 Olimpiya o‘yinlaridan eng qiziqarli va ajabtovur suratlar hamda ularga sharhlarni taqdim qiladi.

Olimpiya o‘yinlarining ochilish marosimiga hamda bellashuvlarni tomosha qilishga bir qator mashhurlar tashrif buyurdi. Jumladan, AQSH Prezidenti Jo Baydenning rafiqasi, mamlakat birinchi xonimi Jil Bayden, Xalqaro futbol federatsiyasi (FIFA) prezidenti Janni Infantino, Buyuk Britaniya Bosh vaziri Kir Starmer, amerikalik qo‘shiqchi va aktrisa Ledi Gaga, amerikalik qo‘shiqchi Snup Dogg, “Vogue” jurnalining bosh muharriri Anna Vintur, amerikalik aktyor Tom Kruz hamda boshqalar jonli o‘yinlarni tomosha qildi.