Олимпия ўйинларининг илк ҳафтаси қандай ўтди? (фоторепортаж)

Франциянинг Париж шаҳри мезбонлик қилаётган ёзги Олимпия ўйинларининг дастлабки ҳафтаси жуда қизғин баҳсларга бой бўлди. Футбол бўйича Ўзбекистон шарафини ҳимоя қилишга отланган Олимпия жамоаси мусобақанинг 1-турида Испанияга қарши баҳс олиб бориб, 2:1 ҳисобида мағлубиятга учради. Иккинчи баҳсда Мисрга қарши кечадиган ўйинда очко олишни умид қилган Темур Кападзе шогирдлари Нант шаҳридаги “Божуар” стадионида 1:0 ҳисобида имкониятни бой берди. Шу билан Доминиканга қарши яна битта ўйин қолганига қарамасдан, улар учун Париж Олимпиадаси ўз поёнига етди.

Дзюдо бўйича эса ўзбекистонлик спортчи Диёра Келдиёрова ҳам қувончли, ҳам тарихий ғалабани қайд этди. Негаки у Ўзбекистон тарихида ёзги Олимпиада баҳсларида олтин медаль олган илк аёл спортчи сифатида тарихга кирди. Ҳали шу пайтгача ўзбекистонлик аёл спортчилардан ҳеч ким бундай муваффақиятга эришмаган эди. Ҳозиргача ёзги Олимпия ўйинларида фақат Екатерина Хилько бронза медалини қўлга киритган (Пекин-2008, трамплинда сакраш) ва аёллар орасида медаль олган ягона спортчи эди. Келдиёрова тарих ёзди.

Ҳали олдинда бир нечта баҳслар кутиб турибди. QALAMPIR.UZ Париж-2024 Олимпия ўйинларидан энг қизиқарли ва ажабтовур суратлар ҳамда уларга шарҳларни тақдим қилади.

Олимпия ўйинларининг очилиш маросимига ҳамда беллашувларни томоша қилишга бир қатор машҳурлар ташриф буюрди. Жумладан, АҚШ Президенти Жо Байденнинг рафиқаси, мамлакат биринчи хоними Жил Байден, Халқаро футбол федерацияси (FIFA) президенти Жанни Инфантино, Буюк Британия Бош вазири Кир Стармер, америкалик қўшиқчи ва актриса Леди Гага, америкалик қўшиқчи Снуп Догг, “Vogue” журналининг бош муҳаррири Анна Винтур, америкалик актёр Том Круз ҳамда бошқалар жонли ўйинларни томоша қилди.