Olmo uchun kutilmagan da’vogar paydo bo‘ldi

Madridning “Real” klubi futbolchi Dani Olmoni sotib olmoqchi. Bu haqda “Sport 45” nashri xabar berdi.

Manbaga ko‘ra, “Barselona” Dani Olmoni La Liga ro‘yxatidan o‘tkaza olmayotgan bir vaqtda, futbolchiga “Real Madrid”dan taklif tushdi. “Qirollik klubi” yozda hujumkor yarim himoyachi uchun 60 million yevro to‘lashga tayyor. Shuningdek, ispaniyalik futbolchi uchun “Atletiko” va “Sevilya” jamoalari ham xaridorlar qatorida keltirilgan.

Ma’lumot o‘rnida, “Barselona” Dani Olmo va Pau Viktorni La Liga ro‘yxatidan o‘tkaza olmayapti. Bu borada klub Ispaniya futbol federatsiyasi va La Liga rahbariyatidan 2 marta rad javobini oldi. Klubning so‘nggi imkoni, prezident Laporta bu masalani sudgacha oshirib, sudda hal qilmoqchi.

Dani Olmo kataloniyaliklar safiga 2024 yilning yozida kelib qo‘shildi va joriy mavsum barcha musobaqalarda 15 ta o‘yinda maydonga tushib, 6 ta gol urdi va 1 ta golga hammuallif bo‘ldi. Uning narxi “Transfermarkt” portalida 60 million yevroga baholangan.