OFK Osiyo kubogi o‘tkazilish sanasini e’lon qildi

Osiyo futbol konfederatsiyasi (OFK) 2024 yilda Qatar maydonlarida o‘tkaziladigan Osiyo kubogining aniq sanalarini ma’lum qildi. Unga ko‘ra, qit’a birinchiligi uchun kurash 2024 yilning 12 yanvaridan 10 fevraliga qadar bo‘lib o‘tadi.

Turnir Qatardagi 8 ta stadion – “Al-Bayt”, “Halifa”, “Al-Tumama”, “Education City”, “Al-Janub”, “Ahmad Bin Ali”, “Jassim Bin Hamad”, “Abdullah Bin Halifa”da o‘tkaziladi. 

Musobaqada sloveniyalik mutaxassis Srechko Katanets murabbiyligidagi O‘zbekiston milliy terma jamoasi ham ishtirok etadi. Turnirning guruh bosqichiga qur’a tashlash marosimi 11 may kuni bo‘lib o‘tadi.

Qayd etish joiz, Osiyo kubogi dastlab Xitoyda 2023 yilning 16 iyunidan 16 iyuliga qadar o‘tkazilishi rejalashtirilgan edi, biroq 2022 yil 14 may kuni OFK Xitoyning COVID-19 pandemiyasi va Xitoyning “Zero-Covid”siyosati sabab bo‘lgan holatlar tufayli turnirni chin yurtida o‘tkazmasligini e’lon qildi.