OAVda ilk bor Turkmaniston birinchi xonimining surati e’lon qilindi

Turkmaniston Prezidenti Gurbanguli Berdimuhamedovning turmush o‘rtog‘i Ogulgerek Berdimuhamedovaning suratlari ilk bor ommaviy axborot vositalarida e’lon qilindi. Surat Turkiya va Turkmaniston Prezidentlarining Ashxoboddagi uchrashuvida olingan. 

Qayd etilishicha, joriy yilning 27 noyabr kuni Gurbanguli Berdimuhamedov va Turkiya Prezidenti Rajab Toyib Erdo‘g‘an o‘rtasida muzokara bo‘lib o‘tgan. Shu sabab Erdo‘g‘an rafiqasi Emine Erdo‘g‘an bilan Turkmanistonga kelgan.

Tashrifni yoritgan turk nashrlari Erdo‘g‘an va Berdimuhamedov juftligining qo‘shma fotosuratlarini chop etgan. Bu Turkmaniston birinchi xonimi Ogulgerek Berdimuhamedovaning birinchi rasmiy suratidir.

Ushbu tashrifni yoritgan Turkmaniston matbuoti esa Berdimuhamedovaning suratlarini chop etmagan. Telereportajda Berdimuhamedovning rafiqasi faqat ziyofat suratga olinayotganda kadrga tushgan, biroq operator unga e’tibor qaratmagan.

Ma’lumot uchun, Gurbanguli Berdimuhamedovni televizorda bolalar va nevaralar qurshovida tez-tez ko‘rsatishadi, biroq uning rafiqasi doim sahna ortida qolgan.