Niderlandiya Ukrainaga F-16 qiruvchi samolyotlarini yetkazib berish ustida ishlayapti

Niderlandiya Ukrainaga F-16 qiruvchi samolyotlarini yetkazib berish bo‘yicha bir qarorga kelish uchun hamkorlar bilan yaqindan ishlamoqda. Bu haqda bugun, 4 may kuni Niderlandiya Bosh vaziri Mark Ryutte Gaagada Ukraina Prezidenti Vladimir Zelenskiy bilan bo‘lib o‘tgan matbuot anjumanida aytib o‘tdi.

“Biz sheriklarimiz bilan Ukrainaga F-16 samolyotlarini yetkazib berish bo‘yicha olib borilgan muhokamalar natijalariga ko‘ra bir xulosaga kelish uchun yaqindan ishlayapmiz. Hozircha bir xulosaga kelganimiz yo‘q”, degan Mark Ryutte. 

Shu bilan birga, hukumat rahbari xuddi shunday munozaralar gaubitsalar, Leopard 2 tanklarini yetkazib berish bo‘yicha ham bo‘lib o‘tganini eslatib o‘tgan. Buning natijasida esa hozirda Leopard 2 tanklari va gaubitsalar Ukrainaga topshirilgan.

Niderlandiya Bosh vaziri Ukrainaning NATOga a’zo bo‘lishi haqida to‘xtalar ekan, ittifoqning Vilnyusda bo‘lib o‘tadigan sammitida bu borada aniq qadamlar qo‘yilishi muhimligini ta’kidlagan. 

“Biz Ukrainaning ambitsiyalarini qo‘llab-quvvatlaymiz. Endilikda aniq qadamlar qo‘yishimiz, lekin buni birgalikda qilishimiz kerak”, degan Bosh vazir.