Neymar Saudiya klubiga o‘tishga yaqin turibdi

Saudiya Arabistonining “Al-Hilol” klubi PSJ hujumchisi Neymarning transferi uchun rasmiy hujjatlarni tayyorlamoqda. Bu haqda futbol jurnalisti Fabritsio Romano o‘zining X sahifasida ma’lum qildi.

Manbaga ko‘ra, bugun, 14 avgust kuni Saudiyada Neymar transferi uchun jiddiy tayyorgarlik ishlari olib boriladi. “Al-Hilol” allaqachon Neymarni tibbiy ko‘rikdan o‘tkazishga hozirlik ko‘rmoqda va bu borada futbolchining vakillaridan ruxsat kutmoqda.

Qayd etilishicha, Neymar “Al-Hilol” klubi bilan ikki yillik shartnoma borasida kelishib olgan. Saudiyada ikki yil ichida futbolchi salkam 160 million yevro ishlab oladi.

Neymar 2017 yildan beri PSJda o‘ynab kelmoqda. Futbolchining klub bilan shartnomasi 2025 yilgacha mo‘ljallangan. 2022/2023 yilgi mavsumda 31 yoshli braziliyalik PSJ safida barcha turnirlar doirasida 29 ta o‘yinda qatnashib, 18 ta gol va 16 ta golli uzatmaga mualliflik qildi.