Netanyaxu Tramp bilan ochiq ziddiyatga kirishishga tayyor – OAV

Isroil Bosh vaziri Binyamin Netanyaxu AQSH Prezidenti Donald Tramp bilan ochiq ziddiyatga kirishishga tayyor. Bu haqda “Al-Monitor” xabar berdi.

“Netanyaxu jar yoqasida turibdi. U G‘azo va Livan masalalari bo‘yicha AQSH administratsiyasi bilan to‘g‘ridan to‘g‘ri to‘qnashuvga kirishish kerakmi-yo‘qmi, shuni hal qilishga urinmoqda. U bu nimaga olib kelishini biladi, ammo hozirgi vaziyat ham bundan yaxshiroq emas”, degan nashr suhbatdoshlaridan biri.

Manbalarning ma’lumotlariga ko‘ra, Tramp Netanyaxu bilan muloqotda Isroil manfaatlarini juda kam hisobga oladigan ultimatumlarga o‘tgan. Shu bilan birga, so‘nggi oylarda ikki yetakchining shaxsiy munosabatlari ham sezilarli darajada yomonlashgan. Isroildagi parlament saylovlari arafasida Netanyaxu Tramp bilan ochiq ziddiyatga kirishish va AQSH oldida milliy xavfsizlik manfaatlarini keskin himoya qilish o‘zining “Likud” partiyasi reytingini oshirishi mumkin deb hisoblaydi.

“Ko‘pchilik Netanyaxu saylovlarga qadar Tramp bilan to‘qnashish AQSH Prezidenti bilan aslida qolmagan mustahkam do‘stlikdan maqtanishdan ko‘ra foydaliroq bo‘ladi degan xulosaga yaqinlashmoqda, deb hisoblaydi”, deya qo‘shimcha qilgan nashrning boshqa bir suhbatdoshi.

Qayd etilishicha, Netanyaxuning Trampning kuyovi va uning norasmiy vakili Jared Kushner bilan oxirgi uchrashuvi murosali natijalarni keltirgan, chunki Isroil Bosh vaziri HAMAS harakatini qurolsizlantirish boshlanmagunicha G‘azodan qo‘shinlarni olib chiqish imkonsizligi haqidagi pozitsiyasini himoya qila olgan.

“Tramp kamida oraliq saylovlargacha Isroil va HAMAS o‘rtasidagi nizoni to‘xtatishda erishgan muvaffaqiyatini saqlab qolishi kerak. Netanyaxuga esa kamida Knessetga saylovlargacha Isroil qo‘shinlarini olib chiqishning sharti sifatida HAMASni qurolsizlantirish zarur. Nabatdagi inqiroz avj olmaguncha, har ikki tomon muayyan ilgarilashga erishdi”, deydi nashr manbalaridan biri.

Eslatib o‘tamiz, avvalroq Binyamin Netanyaxu Donald Trampning G‘azo bo‘yicha 15 banddan iborat rejasini rad etgani, HAMAS “haqiqatan ham” qurolsizlantirilmaguncha Isroil qo‘shinlari olib chiqilmasligini ma’lum qilgani haqida xabar berilgan edi.

Keyinchalik sakkiz mamlakat tashqi ishlar vazirlari qo‘shma bayonot bilan chiqib, Netanyaxu Trampning “yo‘l xaritasi”ni rad etgani sababli Isroilni G‘azo bo‘yicha tinchlik rejasini barbod qilishda aybladi.