“Neftchi” taniqli ikki futbolchini o‘z safiga qo‘shib oldi

Farg‘onaning “Neftchi” klubi o‘zbekistonlik taniqli futbolchilar Jamshid Iskandarov va Jamshid Boltaboyev bilan shartnoma tuzdi. Bu haqda klub matbuot xizmati xabar berdi.

Manbaga ko‘ra, o‘tgan mavsumni “Navbahor”da o‘tkazgan har ikki futbolchi ham yangi mavsumda Farg‘ona klubi safida to‘p tepadi.

Ma’lumot o‘rnida, Jamshid Iskandarov 1993 yilda Urganch shahrida tug‘ilgan. Jamshid Iskandarov  professional futboldagi faoliyatini Samarqandning “Dinamo” klubida boshlagan. Keyinchalik Toshkentning “Paxtakor” va “Lokomotiv”, Janubiy Koreyaning “Seongnam” jamoalarida to‘p surgan. Boltaboyev esa 1996 yilda Toshkent shahrida tavallud topgan. “Paxtakor” futbol akademiyasida tahsil olgan yosh futbolchi faoliyatini O‘zbekistonning “Paxtakor”, “So‘g‘diyona” va “Navbahor” kabi grand jamoalarida olib borgan.

Eslatib o‘tamiz, avvalroq “Neftchi” O‘zbekiston terma jamoasi himoyachisi Farrux Sayfiyev va taniqli futbolchi Ikrom Aliboyevni o‘z safiga qo‘shib olgandi.