Muftiy Xoliqnazarovga yangi o‘rinbosar tayinlandi

O‘zbekiston musulmonlari idorasi raisi, muftiy Shayx Nuriddin Xoliqnazarovga yangi o‘rinbosar tayinlandi. Bu haqda idora matbuot xizmati xabar berdi. 

Ma’lum qilinishicha, bugun, 23 noyabr kuni Imom Buxoriy nomidagi Toshkent islom instituti rektori, professor Muhammadolim Muhammadsiddiqov egallab turgan vazifasidan ajralmagan holda O‘zbekiston musulmonlari idorasi raisining Yoshlar ishlari bo‘yicha o‘rinbosari lavozimiga tayinlangan. 

Muhammadsiddiqov Imom Buxoriy nomidagi Toshkent islom instituti, Misrdagi Qohira davlat universiteti va Toshkent davlat sharqshunoslik institutini tamomlagan.

U faoliyati davomida Din ishlari bo‘yicha qo‘mita bo‘lim boshlig‘i, O‘zbekiston xalqaro islom akademiyasi prorektori, kafedra mudiri vazifalarida mehnat qilgan.

Siyosiy fanlar doktori (DSc), professor Muhammadolim Muhammadsiddiqov 2023 yil yanvar oyidan hozirga qadar Imom Buxoriy nomidagi Toshkent islom instituti rektori vazifasida faoliyat yuritib kelmoqda.