Muhammad Angliyada o‘g‘il bolalar uchun eng ommabop ismga aylandi

Muhammad ismi Angliya va Uelsda o‘g‘il bolalar uchun eng mashhur ism bo‘lib, rasmiy reytingda Noah (Nuh)ni ortda qoldirdi. Bu haqda “Daily Mail” xabar berdi. 

Mamlakat milliy statistika boshqarmasi (ONS) ma’lumotlariga ko‘ra, 2023 yilda 4600 dan ortiq o‘g‘il bolalarga Muhammad ismi qo‘yilgan. Bu 2022 yilga nisbatan deyarli 500 taga ko‘pdir.

Shu bilan birga, Nuhlar soni 4586 tadan 4382 taga tushgan. Uchinchi o‘rinni egallagan Oliverning ham mashhurligi pasaygan.

Qayd etilishicha, Oliviya ketma-ket sakkizinchi yil ayol ismlari ro‘yxatida birinchi o‘rinni saqlab turibdi. Ameliya va Isla esa ikkinchi va uchinchi o‘rinlarni egallagan.

Tahlilchilar, shuningdek, farzandlariga Margot va Kilian kabi ismlarni tanlagan ota-onalar sonining ko‘payishini qayd etgan.

Ma’lumot uchun, ONS har yili chaqaloq ismlari haqidagi so‘nggi ma’lumotlarni tahlil qilib, ba’zi ismlarning qanday qilib ommabopligi yoki mashhurligi tendensiyalarini ochib beradi.

Eslatib o‘tamiz, O‘zbekistonda 2023 yil davomida qizlarga Soliha, o‘g‘il bolalarga esa Muhammadali ismlari eng ko‘p qo‘yilgani haqida xabar berilgandi.