Mirziyoyev yana uch Paralimpiada chempionlarini telefon orqali tabrikladi (video)

Prezident Shavkat Mirziyoyev Fransiya poytaxti Parij shahrida o‘tayotgan Paralimpiada o‘yinlarida terma jamoaga navbatdagi oltin medallarni keltirgan para yengil atletikachilar – Elbek Sultonov, Yorqinbek Odilov hamda taekvondochi Asadbek Toshtemirov bilan telefon orqali suhbatlashdi. Bu haqda Prezident matbuot xizmati xabar berdi.

Davlat rahbari sportchilarni g‘alaba bilan qutlab, medallar Mustaqillik kuniga munosib sovg‘a bo‘lganini ta’kidladi.

Shuningdek, Prezident paraatletlarning murabbiylari va ota-onasiga minnatdorlik bildirib, kecha sovrindor bo‘lgan sportchilarga ham salom va tabrik so‘zlarini yo‘lladi.

Ma’lumot uchun, hozircha O‘zbekiston delegatsiyasi jamg‘argan medallar soni 11 ta: 5 ta oltin, 3 ta kumush va 3 ta bronza.

Eslatib o‘tamiz, avvalroq Prezident Shavkat Mirziyoyev Paralimpiada o‘yinlarida terma jamoaning ilk oltin medallarini qo‘lga kiritgan yengil atletikachilar – Asila Mirzayorova va Qudratilloxon Ma’rufxo‘jayev bilan telefon orqali tabriklagandi.