Mirziyoyev Birinchi prezident haykali poyiga gulchambar qo‘ydi

Prezident Shavkat Mirziyoyev bugun, 30 yanvar kuni Toshkent shahridagi Islom Karimov haykali poyiga gulchambar qo‘ydi. Bu haqda Prezident matbuot xizmati xabar berdi.

Marosimda Oliy Majlis palatalari, Prezident Administratsiyasi va hukumat vakillari, ziyolilar, shahar jamoatchiligi jam bo‘ldi.

“Bu el-yurtga xizmat unutilmasligi, hamisha e’zozlanishidan dalolat. Shavkat Mirziyoyevning e’tibori bilan Birinchi Prezidentimizning xotirasi abadiylashtirildi, u kishi tavallud topgan 30 yanvar har yili nishonlanadigan bo‘ldi. Toshkentda ilmiy-ma’rifiy yodgorlik majmuasi tashkil etildi. Samarqandga tashriflar chog‘ida Islom Karimov maqbarasini ziyorat qilish ezgu an’anaga aylandi”, deyiladi xabarda.

 Qur’on oyatlari o‘qilib, duo qilindi. Birinchi Prezidentimizning xalq manfaati yo‘lida qilgan ishlari, fazilatlari yodga olindi.Shunday tadbirlar Samarqand va Qarshi shaharlarida ham o‘tkazildi.

O‘zbekistonning Birinchi prezidenti Islom Karimov 1938 yil 30 yanvarda Samarqandda tug‘ilgan. U 1991 yildan 2016 yilgacha davlat rahbari bo‘lgan.