Mirziyoyev Bakuda qator uchrashuvlar o‘tkazdi

Bugun, 2 mart kuni Ozarbayjon poytaxti Bakuda Qo‘shilmaslik harakati sammitining yalpi sessiyasida ishtirok etgan O‘zbekiston Prezidenti Shavkat Mirziyoyev, sammit yakunlangach, delegatsiyalar va xalqaro tashkilotlar rahbarlari bilan qator uchrashuvlar o‘tkazdi.

Xususan, Turkmaniston Prezidenti Serdar Berdimuhamedov bilan suhbatda savdo-iqtisodiy, transport-kommunikatsiya va energetika sohalarida qo‘shma loyihalarni ilgari surish masalalari muhokama qilingan.

Mirziyoyev, shuningdek, Ras-al-Hayma amirligi amiri, BAA Oliy kengashi a’zosi shayx Saqr Al-Qosimiy bilan ham uchrashdi. Unda yetakchi kompaniyalarni yangi investitsiya loyihalarini shakllantirish va amalga oshirishga jalb qilish masalalari ko‘rib chiqilgan.

Qolaversa, BMT Bosh Assambleyasi 77-sessiyasi raisi Chaba Kyoryoshi bilan yetakchi xalqaro tashkilotning joriy yil sentyabr oyida o‘tadigan yalpi sessiyasining kun tartibidagi masalalar yuzasidan fikr almashilgan.

Jahon turizm tashkiloti bosh kotibi Zurab Pololikashvili YUNVTO Bosh assambleyasining joriy yil 16-20 oktyabr kunlari Samarqand shahrida o‘tadigan navbatdagi sessiyasiga tayyorgarlik ko‘rish va uni o‘tkazish bo‘yicha olib borilayotgan ishlar to‘g‘risida axborot bergan.

Turizm sohasida kadrlar tayyorlash bo‘yicha qo‘shma dasturni amalga oshirish masalalari ham ko‘rib chiqilgan.