Mirziyoyev Bahouddin Naqshband maqbarasini ziyorat qildi

O‘zbekiston Prezidenti Shavkat Mirziyoyev Buxoro viloyatiga bordi. Davlat rahbari an’anadagidek tashrifini Bahouddin Naqshband maqbarasini ziyorat qilishdan boshladi. Bu haqda Prezident matbuot xizmati xabar berdi.

Qayd etilishicha, ziyoratda Qur’on oyatlari tilovat qilinib, Allohdan o‘tganlarga rahmat, O‘zbekistonga tinchlik-farovonlik tilab duo o‘qilgan.

Diniy ulamo bilan suhbatda yoshlar ta’lim-tarbiyasi, Islom ma’rifati haqida so‘z borib, yoshlarni yot g‘oyalar ta’siridan asrash, bandligiga ko‘maklashish, muhtoj oilalarni alohida mehr-e’tiborga olish muhimligi ta’kidlangan.

Shuningdek, majmua atrofida rejalashtirilayotgan qurilish-ta’mirlash loyihasi ko‘rib chiqilgan. Unga ko‘ra, Bahouddin Naqshband maqbarasiga Toqi miyona darvozasidan boruvchi tarixiy yo‘lakni tiklash, Doniyolbiy madrasasini ta’mirlash, tahoratxona va muzey barpo etish kabilar mo‘ljallanmoqda.

Davlat rahbari ziyorat turizmi uchun sharoitlarni kengaytirish, xorijdan Buxoroga to‘g‘ridan-to‘g‘ri qatnovlar va mehmonxona tashkil etish, qabristonni obodonlashtirish bo‘yicha ko‘rsatmalar bergan.