Millatchilik qurboni Qobiljon dafn etildi (video)

Rossiyaning Odinsovo shahri Gorki-2 posyolkasidagi maktabda vahshiylarcha o‘ldirilgan 10 yashar Qobiljon Aliyevning jasadi bugun, 18 dekabr kuni ertalab Tojikistondagi uyiga olib kelindi va vidolashuv marosimi uchun Shahrinav tumanidagi Adjam qishlog‘iga, qarindoshining uyiga ko‘chirildi. 

Kuchli yog‘ingarchilikka qaramay, Tojikistonning bir nechta hududlaridan ko‘plab odamlar vidolashuv marosimida ishtirok etdi. Janoza marosimi Shahrinav tumanidagi Akram Hasanov jamoati Adjam qishlog‘idagi masjidda bo‘lib o‘tdi. 

Qobiljon Aliyevning janozasi Tojikiston muftiysi Saidmukarram Abdulkodirzoda boshchiligida o‘qilgan. 

Marhum bolakay qabristonda otasining qabri yoniga dafn etilgan. 

17 dekabr kuni Tojikiston Tashqi ishlar vazirligi Odinsovoning Gorki-2 qishlog‘idagi Uspenskiy o‘rta maktabida to‘rtinchi sinf o‘quvchisining o‘ldirilishini qoraladi. Vazirlik respublika fuqarosi bo‘lgan bolaning o‘limi munosabati bilan hamdardlik bildirdi. 

Eslatib o‘tamiz, 16 dekabr kuni ertalab 15 yoshli to‘qqizinchi sinf o‘quvchisi maktabga pichoq bilan bostirib kirdi. U qo‘riqchi va to‘rtinchi sinf o‘quvchisini pichoqlab, bolani o‘ldirdi. Tergov qo‘mitasi Rossiya Jinoyat kodeksining 105-moddasi (qotillik) va Rossiya Jinoyat kodeksining 30-moddasi 3-qismi, 105-moddasi 2-qismi (ikki yoki undan ortiq odamni o‘ldirishga urinish) bo‘yicha jinoiy ish qo‘zg‘atdi. Tergov qo‘mitasi hibsga olingan 15 yoshli o‘smir so‘roq paytida aybini tan olganini, jinoyatga tayyorgarlik ko‘rish va tafsilotlarni ham bayon qilganini ma’lum qildi.

Hujumni uyushtirgan 15 yoshli Timofey K. ismli bola qo‘lga olingan. Uning telefonidagi galereyada selfilar va halok bo‘lgan maktab o‘quvchisining surati aniqlangan. Shuningdek, o‘smir ekstremistik iqtiboslar va o‘ng radikal tashkilotlar nomlari bilan bezatilgan o‘z kaskasini ham suratga olgan. Xususan, kaskada “Sygaown” so‘zi yozilgan bo‘lib, bu 2022 yilda AQSHda sodir etilgan ommaviy otishmaga ishora hisoblanadi.