Messining “Barselona”ga qaytishi klubga qanday foyda keltiradi?

“Barselona” Lionel Messining transferi klubning moliyaviy holatiga ijobiy ta’sir ko‘rsatishini kutmoqda. Argentinalik hujumchining qaytishi Kataloniya jamoasi uchun ustuvor vazifa hisoblanadi. Klub bosh murabbiyi Xavi Messining jamoaga qaytishini taxmin qilib, yangi mavsum uchun rejalar tuzmoqda. Bu haqda “Mundo Deportivo” xabar berdi.

Manbaga ko‘ra, “Barselona” Leoni sport va moliyaviy sabablarga ko‘ra qaytarishni istamoqda. Qayd etilishicha, Messining qaytishi “Barselona”ning kelasi mavsumdagi umumiy daromadining 25 foizini tashkil qilishi mumkin. Klubdagi ba’zi prognozlarga ko‘ra, bu ulush 33 foizga yetishi kutilmoqda.

Ta’kidlanishicha, pandemiyadan oldin Messining “Barselona” daromadiga ta’siri yiliga 250-300 million yevroni tashkil qilgan.

“Barselona” argentinalik futbolchiga 1 yoki 2 yillik shartnoma taklif qilishni rejalashtirmoqda. Agar Messi ikkinchi variantga rozi bo‘lsa, u klubning 125 yilligiga bag‘ishlangan tadbirlarda ishtirok etadi.

35 yoshli hujumchining PSJ bilan shartnomasi joriy mavsum oxirigacha amal qiladi.