Messi Ronalduga yaqinlashmoqda

Argentina terma jamoasi hujumchisi Lionel Messi terma jamoa safidagi gollari sonini 100 tadan oshirdi. Hujumchi Kyurakao terma jamoasi bilan o‘rtoqlik o‘yinida xet-trik qayd etdi. Hozirda uning hisobida umumiy 102 ta gol bor. Shu tariqa, Messi o‘z mamlakati terma jamoasi safida 100 dan ortiq gol urishga muvaffaq bo‘lgan tarixdagi uchinchi futbolchiga aylandi.

Bu ko‘rsatkich bo‘yicha Portugaliya terma jamoasi hujumchisi Krishtianu Ronaldu 122 gol bilan peshqadamlik qilmoqda. Faoliyatini yakunlagan eronlik futbolchi Ali Dayei terma jamoa safida 109 ta gol urgan. Bu ketishda Messi tez orada eronlik futbol afsonasidan ham o‘zib ketadi.

Argentina terma jamoasi Kyurakao jamoasini 7:0 hisobida mag‘lub etdi. Uchrashuvning 20-daqiqasida Lionel Messi hisobni ochgan bo‘lsa, oradan uch daqiqa o‘tib, Nikolas Gonsales hisobni yiriklashtirdi. 33-daqiqada Messi dublga erishdi. Enzo Fernandes 35-daqiqada Messining uzatmasidan gol urdi. Oradan ikki daqiqa o‘tib, Messi o‘yindagi uchinchi golini kiritdi. Anxel Di Mariya 78-daqiqada penaltidan gol urdi. Gonsalo Montel 87-daqiqada yakuniy hisobni o‘rnatdi – 7:0.