Messi Xavi bilan suhbatlarida nimalarni gaplashishi ma’lum bo‘ldi

“Barselona” bosh murabbiyi Xavi PSJ hujumchisi Lionel Messi bilan faol aloqada bo‘lib turibdi. Bu haqda “Barca Universal” xabar berdi.

Manbaga ko‘ra, Messi Xaviga tezroq klubga qaytishni istayotganini aytgan. Shuningdek, ular ko‘pincha jamoa, o‘yinlar, atmosfera va kiyinish xonasidagi muhit haqida suhbat qurishadi. Messining o‘zi ham “Barselona”ga qaytish fikrida bo‘lib turibdi. 

Ma’lum bo‘lishicha, argentinalik futbolchi Xavi bilan “Barselona” haqida gaplashganida ko‘pincha “Biz g‘alaba qozondik” yoki “Yaxshi o‘ynadik” degan iborani ishlatadi, ya’ni u o‘zini xuddi hali ham jamoaning a’zosidek tutadi.

Messi joriy mavsumda PSJ safida 25 ta o‘yinda maydonga tushib, 14 ta gol urdi va 14 ta golli uzatmani amalga oshirdi.

Eslatib o‘tamiz, avvalroq, “Barselona” Messining klubga qaytishi uchun yirik homiylar bilan shartnomalar ustida ishlayotgani xabar qilingandi. Shuningdek, klub stadionini rekonstruksiya qilish uchun katta miqdorda kredit olishi ma’lum bo‘ldi.