Melaniya Tramp Oq uyni Yangi yilga tayyorladi (fotoreportaj)

AQSHning birinchi xonimi Melaniya Tramp Rojdestvo bezaklarini taqdim etdi. Shuningdek, u Oq uy hovlisida Prezident archasini qabul qilib oldi. Bu haqda Oq uy rasmiy sahifasida ma’lum qildi.

Keltirilishicha, bu yilgi bayram mavzusi, “Uy – yurak bor joyda” deb nomlangan. Bayram dekori, shuningdek, kelasi yili Mustaqillik Deklaratsiyasi imzolanishi va Qo‘shma Shtatlar tashkil topganining 250 yilligi nishonlanishiga ham ishora qiladi.

Mamlakatning turli hududlaridan kelgan o‘nlab ko‘ngillilar Prezident qarorgohi zallarini bezashda ishtirok etdi. Oq uyga o‘rnatilgan bezaklar orasida 75 ta gulchambar, 51 ta archa, 200 metrdan ortiq gulchambar, 7,5 kilometr lenta, shuningdek, ko‘plab oltin yulduzlar, kapalaklar va boshqa elementlar bor.

Moviy xonadagi asosiy Rojdestvo daraxti xizmat vazifasini bajarishda yaqinlarini yo‘qotgan oilalar sharafiga oltin yulduzlar bilan bezatildi. An’anaga ko‘ra, rasmiy daraxt har bir shtat va hududni ramziy anglatadi. Bu yil unda har bir shtatning rasmiy qushi va gulining tasvirlari joy olgan.

Sharqiy xonadagi daraxtlar qizil, oq va ko‘k ranglarda bezatilib, yaqinlashib kelayotgan “Amerika 250” tadbirlarini ta’kidlash uchun oltin burgut kabi milliy ramzlar bilan boyitilgan.

Yashil xonada AQSHning Birinchi Prezidenti Jorj Vashington va amaldagi Prezident Donald Trampning yirik portretlari namoyish etilgan. Har ikki portret 6000 dan ortiq Lego qismlaridan yig‘ilgan.

Bayramning asosiy dekorlaridan biri – Davlat oshxonasida joylashgan zanjabilli nonli Oq uy maketi bo‘lib, u 120 funt zanjabilli non, 100 funt muz, 9 funt shokolad va 5 funt muzli bezaklardan yasalgan.

Birinchi xonim jurnalistlarga bu yil avvalgilaridan boshqacha bo‘lishini aytdi.

Oq uyga keltirilgan archaning bo‘yi 25 fut (7,6 metr) bo‘lib, u Michigan shtatining markaziy qismidagi Sidney shahrida joylashgan Korson’s Tree fermasida o‘stirilgan. 

Archani an’anaviy tarzda Oq uyning Moviy xonasiga o‘rnatish rejalashtirilgan. Melaniya Tramp archani Shimoliy portik zinapoyasida qabul qilgach, mutaxassislar uni qarorgoh ichiga joylashtirishga tayyorgarlikni boshladi. Oq uy hududi boshqaruvchisi Deyl Heyni bu archani sentyabr oyidayoq tanlab qo‘ygan edi.