Mahsa Amini oilasiga Eronni tark etish taqiqlandi
Olam
−
09 dekabr 2023
8594Eron Mahsa Amini oilasiga bu yil “Ayol, hayot, erkinlik” harakati tomonidan marhumaga berilgan Saxarov mukofotini olish uchun mamlakatni tark etishga ruxsat bermadi. Bu haqda IranWire nashri xabar berdi.
Huquq-tartibot idoralari Mahsa oilasini 12 dekabr kuni bo‘lib o‘tadigan taqdirlash marosimi uchun Fransiyaga uchib ketish arafasida Imom Homanaiy nomidagi xalqaro Tehron aeroportida hibsga oldi.
Aminining oilasi qayta-qayta so‘roq qilingan va xavfsizlik kuchlari uning akasi Mahsa Kiarash bilan ziddiyatga borgan va yigit to‘qnashuvlarda jarohat olgan.
Oila a’zolarida Fransiya vizasi va bortga chiqish talonlari bo‘lganiga qaramay, parvozdan bir necha soat oldin huquq-tartibot idoralari xodimlari ularga Erondan chiqib ketish taqiqlanganini ma’lum qilgan, deyiladi manbada.
Avvalroq, Mahsaning otasi Amjad Amini “Jinaning [Mahsaning] ismi butun dunyo bo‘ylab erkinlik va tenglik ramziga aylangan”ini aytgan edi.
Aminining oilasi hozir Eronda qolib ketgan va ularga so‘roq uchun yakshanba kuni pasport bo‘limiga kelishi aytilgan.
Xorijiy nashrlar bu qaror ortidagi aniq sabablar noma’lumligicha qolayotgani, biroq bu Amini oilasini jim bo‘lishga va Eronda avj olgan ayollar huquqlari harakatini bostirishga qaratilgan siyosiy maqsadli harakat ekanligi haqida yozmoqda.
Eron sudi oktyabr oyida oilaning qonuniy vakilini Islom Respublikasiga qarshi “tashviqot faoliyati” uchun bir yillik qamoq jazosiga hukm qilgan edi.
Tehron Islom inqilobi sudining 28-bo‘limi ham oila advokati Solih Nikbaxtni ikki yilga onlayn faoliyat yuritishdan mahrum qildi.
72 yoshli Nikbaxt mahalliy va xorijiy ommaviy axborot vositalariga bergan intervyularida hukumatning Mahsa Amini o‘limi va uning oqibatlariga munosabatini tanqid qilgani uchun sudga tortilgan.
Ma’lumot uchun, 22 yoshli Amini axloq politsiyasi tomonidan “noto‘g‘ri” majburiy ro‘mol o‘raganlikda ayblanib hibsga olingan. Uning 2022 yil 16 sentyabrda hibsdagi o‘limi bir necha oylik milliy noroziliklarni keltirib chiqardi. Xavfsizlik kuchlari bilan to‘qnashuvlarda 500 dan ortiq odam halok bo‘ldi va 20 000 dan ortiq odam, jumladan o‘nlab advokatlar noqonuniy hibsga olindi. Noxolis sud jarayonlaridan so‘ng sud hokimiyati namoyishchilarga qattiq hukmlar, jumladan, o‘lim jazosi ham chiqardi.
Eron rasmiylari hozirgacha o‘nga yaqin yosh namoyishchini qatl etgan.
Eslatib o‘tamiz, avvalroq Eronda Mahsa Amini haqida yozgan jurnalistlar qamalgan edi.