Маҳса Амини оиласига Эронни тарк этиш тақиқланди

Эрон Маҳса Амини оиласига бу йил “Аёл, ҳаёт, эркинлик” ҳаракати томонидан марҳумага берилган Сахаров мукофотини олиш учун мамлакатни тарк этишга рухсат бермади. Бу ҳақда IranWire нашри хабар берди.

Ҳуқуқ-тартибот идоралари Маҳса оиласини 12 декабрь куни бўлиб ўтадиган тақдирлаш маросими учун Францияга учиб кетиш арафасида Имом Ҳоманаий номидаги халқаро Теҳрон аэропортида ҳибсга олди.

Аминининг оиласи қайта-қайта сўроқ қилинган ва хавфсизлик кучлари унинг акаси Маҳса Киараш билан зиддиятга борган ва йигит тўқнашувларда жароҳат олган.

Оила аъзоларида Франция визаси ва бортга чиқиш талонлари бўлганига қарамай, парвоздан бир неча соат олдин ҳуқуқ-тартибот идоралари ходимлари уларга Эрондан чиқиб кетиш тақиқланганини маълум қилган, дейилади манбада.

Аввалроқ, Маҳсанинг отаси Амжад Амини “Жинанинг [Маҳсанинг] исми бутун дунё бўйлаб эркинлик ва тенглик рамзига айланган”ини айтган эди.

Аминининг оиласи ҳозир Эронда қолиб кетган ва уларга сўроқ учун якшанба куни паспорт бўлимига келиши айтилган.

Хорижий нашрлар бу қарор ортидаги аниқ сабаблар номаълумлигича қолаётгани, бироқ бу Амини оиласини жим бўлишга ва Эронда авж олган аёллар ҳуқуқлари ҳаракатини бостиришга қаратилган сиёсий мақсадли ҳаракат эканлиги ҳақида ёзмоқда.

Эрон суди октябрь ойида оиланинг қонуний вакилини Ислом Республикасига қарши “ташвиқот фаолияти” учун бир йиллик қамоқ жазосига ҳукм қилган эди.

Теҳрон Ислом инқилоби судининг 28-бўлими ҳам оила адвокати Солиҳ Никбахтни икки йилга онлайн фаолият юритишдан маҳрум қилди.

72 ёшли Никбахт маҳаллий ва хорижий оммавий ахборот воситаларига берган интервюларида ҳукуматнинг Маҳса Амини ўлими ва унинг оқибатларига муносабатини танқид қилгани учун судга тортилган.

Маълумот учун, 22 ёшли Амини ахлоқ полицияси томонидан “нотўғри” мажбурий рўмол ўраганликда айбланиб ҳибсга олинган. Унинг 2022 йил 16 сентябрда ҳибсдаги ўлими бир неча ойлик миллий норозиликларни келтириб чиқарди. Хавфсизлик кучлари билан тўқнашувларда 500 дан ортиқ одам ҳалок бўлди ва 20 000 дан ортиқ одам, жумладан ўнлаб адвокатлар ноқонуний ҳибсга олинди. Нохолис суд жараёнларидан сўнг суд ҳокимияти намойишчиларга қаттиқ ҳукмлар, жумладан, ўлим жазоси ҳам чиқарди.

Эрон расмийлари ҳозиргача ўнга яқин  ёш намойишчини қатл этган.

Эслатиб ўтамиз, аввалроқ Эронда Маҳса Амини ҳақида ёзган журналистлар қамалган эди.