Mateys de Ligtning tez orada qaysi klubga o‘tishi e’lon qilinadi

“Barselona” tez orada yana bir transferni e’lon qilishi kutilayapti. Unga ko‘ra, “Ayaks” himoyachisi Mateys de Ligt kataloniyaliklar bilan kelishib olgan. Tomonlar bu transfer haqida “Ayaks” hamda “Yuventus” o‘rtasidagi Chempionlar ligasi o‘yinidan oldin e’lon qilishmoqchi.

Ma’lumotlarga ko‘ra, “Barselona” mart oyida “Ayaks” va de Ligtga rasmiy taklif yuborgan edi. Transfer Frenki de Yong uchun berilayotgan mablag‘dan (75 mln. yevro) kamroq pul evaziga amalga oshadi, ammo shartnoma shartlari deyarli o‘xshash.

“Ayaks” de Ligt transferidan katta mablag‘ ishlab olmoqchi edi, ammo futbolchining o‘zi  Kataloniya klubiga o‘tishni istayotgani uchun uni arzonroqqa berib yuborishga rozi bo‘lishdi.

Eslatib o‘tamiz, oldinroq de Ligt uchun kurashda Madridning “Real” klubi yetakchilik qilayotgani aytilgan edi.

Ma’lumot uchun, 19 yoshli gollandiyalik himoyachi ushbu mavsumda “Ayaks” tarkibida 39 ta o‘yinda maydonga tushib 3 ta gol kiritgan.