Malayziya Isroilni BMTdan chiqarib yuborishni taklif qilmoqda

Malayziya Bosh vaziri Anvar Ibrohim kecha, 4 noyabr kuni rasmiy Kuala-Lumpur BMT Bosh Assambleyasi uchun rezolyutsiya loyihasini tayyorlaganini aytdi. Bu haqda “The Malaysian Reserve” xabar berdi.

Unda boshqa davlatlar qatorida Falastin bilan bog‘liq masalalarda qonunlar, qoidalar va qarorlar buzilgan taqdirda Isroilni tashkilot a’zoligidan chiqarish taklif qilingan. Anvar Ibrohim qonunchilarga rezolyutsiya loyihasi muzokaralar jarayonida ekanligi va tez orada ma’qullash uchun BMT Bosh Assambleyasiga taqdim etilishi kutilayotganini aytgan.

“Kuchli choralar, jumladan, inson huquqlari buzilishi va genotsid jinoyatlari ortidan Isroilning BMTdan chiqarilishi imkon qadar tezroq amalga oshirilishi kerak”, degan Bosh vazir.

Uning ta’kidlashicha, Malayziya Isroilning vahshiyliklarini to‘xtatish uchun kun tartibini tinglash va unga doimiy e’tibor berishni ta’minlaydi, shuningdek, qirg‘in kuchayib borayotgan bir paytda Falastin xalqiga muhim yordamlarning yetib borishiga imkon beradi.

Bosh vazirga ko‘ra, rezolyutsiya ma’qullanganidan keyin BMTning Yaqin Sharqdagi Falastinlik qochqinlarga yordam va ishlar agentligi (UNRWA) ta’lim, sog‘liqni saqlash va gumanitar yordam kabi asosiy xizmatlarni ko‘rsatishni davom ettirishi uchun qonuniy asos bo‘lishi kutilmoqda. 

Ma’lumot uchun, Isroil parlamenti o‘tgan hafta UNRWA faoliyatini taqiqlovchi qonun loyihasini qabul qildi, bu esa oxir-oqibat uning G‘azo sektori, bosib olingan G‘arbiy Sohil va Sharqiy Quddusdagi faoliyatiga ta’sir qiladi. Qonun 90 kundan keyin kuchga kiradi.

Eslatib o‘tamiz, avvalroq Malayziya G‘azodan 127 falastinlikni muvaffaqiyatli evakuatsiya qilib, ularni Janubi-Sharqiy Osiyo davlatidagi xavfsiz joyga olib kelgani xabar qilingandi. Erkaklar, ayollar va bolalardan iborat guruh Malayziya Qirollik havo kuchlari samolyotida Subang aviabazasiga yetib kelgan. Ushbu qutqaruv missiyasi joriy yilning 4 avgust kuni Kuala-Lumpurda “Falastin uchun birdamlik” mitingi chog‘ida operatsiya haqida ma’lum qilgan Malayziya Bosh vaziri Anvar Ibrohim tashabbusi bilan boshlangan.