Lukashenko Zelenskiyni Minskni urushga tortishga urinishda aybladi

Belarus fuqarosi Aleksandr Lukashenko kecha, 7 yanvar kuni Ukraina o‘z mamlakatini bardosh bera olmaydigan urushga tortishga urinayotganini aytdi. Bu haqda BelTA xabar berdi.

Lukashenko pravoslav Rojdestvo kunida Logoyskdagi cherkovga tashrifi chog‘ida Minskning turli tashqi chaqiriqlar sharoitidagi taraqqiyoti haqida gapirib, mamlakat atrofida katta taranglik hukm surayotganini ta’kidladi.

Belarus rezidenti Vladimir Zelenskiyning xatti-harakatlarini shubha ostiga oldi, u bilan avvallari yaxshi munosabatda bo‘lganiga qaramay, Zelenskiy mamlakatni urushga tortish uchun “buyruqlar olayotganini” da’vo qildi.

Lukashenko, shuningdek, tinchlikni saqlash muhimligini muhokama qilib, o‘z mamlakati tinchligini saqlash uchun har qanday imkoniyatdan foydalanishini ta’kidladi.

Bundan tashqari, u odamlarni tashqi ayblovlarga e’tibor bermaslikka chaqirdi.

“Eshiting, Belarusdagi diktatura Ukrainadagi demokratiyadan yaxshiroq”, dedi u.

U iqtisodiyotni Minsk uchun asosiy qiyinchilik sifatida belgilab, uni yengib o‘tishga va’da berdi. Zelenskiy hali Lukashenkoning ayblovlariga javob bermadi.

Eslatib o‘tamiz, avvalroq Ukraina Prezidenti Vladimir Zelenskiy amerikalik podkaster Leks Fridmanga bergan intervyusida Rossiya tomonidan boshlangan keng ko‘lamli urush boshida qo‘shni Belarus fuqarosi Aleksandr Lukashenko Rossiyaning Ukrainaga Belarus hududidan raketa hujumlari uchun uzr so‘raganini aytgandi. Rasmiy Minsk Zelenskiyning so‘zlarini qat’iyan rad etdi. Lukashenkoning matbuot kotibi Natalya Eysmont Rossiyaning RBK agentligiga bergan izohida Belarus rezidenti Zelenskiydan kechirim so‘ramaganini aytdi.