Levandovski “Barselona”da Depayning raqamini tortib olishi mumkin

Ispaniyaning “Barselona” klubi rahbariyati jamoaning yangi hujumchisi Robert Levandovski to‘qqizinchi raqamda o‘ynashi kerak deb hisoblamoqda. Bu haqda “Diario Sport” nashri xabar berdi.

Manbaga ko‘ra, hozirda niderlandiyalik hujumchi Memfis Depay to‘qqizinchi raqamni egallab turganiga qaramay, “Barsa” rahbariyati Robertga sevimli raqamini olib berishiga ishonmoqda. Sababi Memfis yaxshi taklif tushadigan bo‘lsa, Kataloniya klubini tark etadi.

Qayd etilishicha, Depay o‘ziga yangi klub topishi kerakligini allaqachon bilgan. “Barselona” rahbariyati Levandovski va Rafinyaning sotib olingani va Usmon Dembele bilan yangi shartnoma imzolanganidan so‘ng, jamoada hujumkor o‘yinchilar ko‘p deb hisoblamoqda. Shuning uchun ular Depay va Martin Breytveyt bilan xayrlashishga qaror qilishgan.

Ma’lumot uchun, Levandovski “Barselona”ga ko‘chib o‘tgunga qadar “Bavariya”da o‘tgan 8 mavsum davomida 375 ta o‘yinda maydonga tushib, 344 ta gol urgan va 72 ta golli uzatma amalga oshirgan. “Transfermarkt” portali polshalik iqtidor egasini 45 million yevroga baholamoqda.