Leskott ayni paytda dunyoning eng yaxshi futbolchisi kimligini aytdi

Angliyalik sobiq futbolchi Joleon Leskott “Real” a’zosi Jud Bellingemni hozirda dunyoning eng yaxshi futbolchisi deb topdi. Bu haqda Leskott “Daily Mail”ga bergan intervyusida aytib o‘tdi.

“Jud dunyodagi eng yorqin iste’dodlardan biri. U ayni damda dunyoning eng yaxshi futbolchisi. Men Yevro-2024 haqida optimistik fikrdaman. Futbolchilar musobaqaga o‘ziga kuchli ishonch bilan boradi. Jamoa tarkibi va sifatini inobatga olgan holda angliyalik muxlislar uchun bu juda hayajonli turnir bo‘ladi. Jud “Real Madrid”ga katta ta’sir o‘tkazdi va bu birmingemlik bola uchun ajoyib holat. U nafaqat futbolchi sifatida, balki shaxs sifatida ham juda kuchli. U hurmatga sazovor va muxlislar hayratiga sabab bo‘la oladigan to‘p ustasi”, deydi Angliya terma jamoasining sobiq himoyachisi.

Bellingem joriy mavsum “qirollik klubi” safida 8 ta o‘yinda maydonga tushib, 8 ta gol urdi va 2 ta golli uzatma muallifiga aylandi. Uning “qaymoqranglilar” bilan amaldagi shartnomasi 2029 yilning 30 iyuniga qadar amal qiladi. “Transfermakrt”ga ko‘ra, futbolchining qiymati 150 million yevroni tashkil etadi.