Koronavirusdan kasallanishni sekinlashtiruvchi dori yaratildi

Polsha olimlari koronavirus infeksiyasini sekinlashtiradigan dori ishlab chiqilganini e’lon qildi. Yagelloniya  universiteti olimlarining ta’kidlashicha, bu vaksina tayyorlash yo‘lidagi ilk qadam hisoblanadi.

"Preparat hayvonlarda sinovdan o‘tkazildi. Dori qo‘llangan jonivorlarning o‘pkasida hech qanday toksik jarayonlar va salbiy holatlar kuzatilmadi", deydi ushbu dori ustida ishlagan olimlardan biri Kshishtof Pirch.

Preparat HTCC deb ataldi. Hali ushbu dorini odamlarda sinab ko‘rishga ruxsat berilmagan.

Ma’lumot uchun, HTCC – qisqichbaqalar yoki qo‘ziqorinlardan olingan aralashma asosida yaratilgan. Tadqiqotchilar ushbu dori virusning "tojini" tashkil etuvchi boshoqsimon oqsilga bog‘lanib, uning odam hujayrasi retseptorlari bilan o‘zaro ta’sirini blokirovka qiladi. Natijada, virus hujayraga kirib borishi qiyinlashadi.

Eslatib o‘tamiz, COVID-19 kasalligini qo‘zg‘atuvchi SARS-CoV-2 virusi va uning odam hujayrasiga qanday kirib borishi haqida ma’lumot bergan edik.