Kongress Trampning “katta chiroyli” qonunini ma’qulladi

AQSH Kongressining Vakillar palatasi a’zolari boshqa qonunlar qatorida federal soliqlarni kamaytirish hamda mudofaa va chegara xavfsizligi uchun xarajatlarni ko‘paytirishni taklif qiluvchi “katta chiroyli” qonunni (The Big Beautiful Bill) ma’qulladi. Bu haqda “Reuters” xabar berdi.

Qonunni minimal talab qilinadigan kongressmenlar soni – Vakillar palatasining 218 a’zosi qo‘llab-quvvatladi. 214 kongressmen unga qarshi ovoz berdi – barchasi demokratlar va ikkita respublikachi.

Qonun bo‘yicha ovoz berishni Vakillar palatasida demokratlar yetakchisi Hakim Jeffris kechiktirdi. U 8 soat 55 daqiqa nutq so‘zladi va Kongress quyi palatasida nutq davomiyligi bo‘yicha rekord o‘rnatdi.

The Big Beautiful Bill bir kun oldin Senat tomonidan qabul qilindi. Endi uni ushbu hujjatni ilgari surgan AQSH Prezidenti Donald Tramp imzolashi kerak. Ehtimol, u bugun, 4 iyul – Amerika Qo‘shma Shtatlari Mustaqillik kuniga qadar uni imzolashga ulgurar.

The Big Beautiful Bill Donald Tramp tomonidan 2017 yilda birinchi prezidentlik davrida kiritilgan soliq imtiyozlarini uzaytiradi. Qonun Qo‘shma Shtatlarning mudofaa va chegaralarini himoya qilishga sarflanadigan xarajatlarni oshirishni nazarda tutadi, shuningdek, Medicaid va SNAP kabi ijtimoiy dasturlarni moliyalashtirishni qisqartirishni nazarda tutadi.

Kongressning Byudjet byurosi qonun federal hukumat qarziga 3,8 trillion dollar qo‘shishini aytdi. Hozirgi qarz 36,2 trillion dollarni tashkil etadi.

Saylovda Trampni qo‘llab-quvvatlagan milliarder Ilon Mask The Big Beautiful Bill yuzasidan AQSH Prezidenti bilan kelishmay qoldi. Tadbirkor tashabbusni tanqid qilib, uni “lobbichilarning keraksiz xarajatlari bilan to‘ldirilgan” “ommaviy va shafqatsiz” qonun deb atadi. Maskning so‘zlariga ko‘ra, qonun byudjet taqchilligini kamaytirish o‘rniga uni oshiradi.