Kim Chen In yangi snayper miltig‘ini sinovdan o‘tkazdi

Shimoliy Koreya yetakchisi Kim Chen In mamlakatdagi qurol-yarog‘ zavodiga tashrif buyurdi. Bu haqda markaziy axborot agentligi xabar berdi.

Qayd etilishicha, u qurol ishlab chiqarish jarayoni va xususiyatlari bilan tanishgan. Shimoliy Koreya rahbari ushbu zavodda ishlab chiqarilgan yangi snayper miltig‘iga alohida e’tibor qaratgan. E’lon qilingan tasvirlarda Kim Chen In hatto snayper miltig‘ini sinab ko‘rgani va undan o‘q uzganini ko‘rish mumkin. 

KXDR axborot agentligi Kimning otgan o‘qlaridan birortasi ham mo‘ljaldan adashmaganligini ko‘klarga ko‘tarib maqtagan.

"O‘rtoq Kim Chen In yangi snayper miltig‘iga qiziqish bildirgan va KXDR texniklari jahon darajasidagi eng yaxshi ko‘rsatkichlarni ko‘rsatayotganini aytdi", deyiladi xabarda.

Avvalroq xorijlik tahlilchilar Ukrainadagi urush Shimoliy Koreyaning o‘z qurollarini sinab olishi uchun arzon va foydali imkoniyat ekanini aytgan edi.

Eslatib o‘tamiz, Rossiya Ukrainadagi urushda Shimoliy Koreya raketalaridan foydalangani tasdiqlangandi.