Xitoyda yana bir amaldor o‘limga hukm qilindi

north_east

Xitoyda sobiq vazir shartli o‘lim jazosiga hukm qilindi

Kecha, 14 oktyabr kuni Xitoyda Van Bo ismli mansabdor poraxo‘rlikda ayblanib, o‘limga hukm qilindi. Bu haqda “China Daily” xabar berdi.

Hukm Xubey provinsiyasi sudi tomonidan chiqarilgan. Van Bo Ichki Mo‘g‘uliston muxtor viloyati Xalq Kongressi Doimiy qo‘mitasi raisining sobiq o‘rinbosari edi. U umrbod siyosiy huquqlaridan mahrum qilindi va uning barcha shaxsiy mol-mulki musodara qilindi.

U 2003 yilning birinchi yarmidan 2024 yilning mayigacha o‘z mansab mavqeini suiiste’mol qilib, jami 449 million yuan (58,5 million dollar) miqdorida pora olgan. Sudlanuvchi o‘z aybiga to‘liq iqror bo‘lgani va tergov bilan hamkorlik qilayotgani uchun hukm ijrosi ikki yilga kechiktirilgan.

So‘nggi bir necha yil ichida Xitoyda korrupsiyaga qarshi keng ko‘lamli kampaniya natijasida ko‘plab amaldorlar o‘z lavozimlarini yo‘qotib, qamoq jazosiga, jumladan, umrbod qamoq jazosiga hukm qilindi. Xitoyda shartli o‘lim jazosini olgan mahbus sinov muddati davomida yangi jinoyat sodir etmasa, uning jazosi umrbod qamoq jazosiga o‘zgartiriladi. Agar mahbus o‘zini yanada yaxshi tutsa, uning qamoq muddati yengillashtirilishi mumkin yoki u shartli ravishda ozod qilinishi mumkin. Biroq Vanning ishida sud, agar u o‘zini yaxshi tutsa ham, jazo muddatini qisqartirish yoki shartli ravishda ozod qilish imkoniyati bo‘lmasligini, ya’ni umrining qolgan qismini faqat panjara ortida o‘tkazishini aytdi.

Sud hujjatlariga ko‘ra, Vanning faoliyati poraxo‘rlik jinoyatini tashkil etadi va u “o‘limga hukm qilinishi kerak, chunki uning pora miqdori nihoyatda katta bo‘lgan va jinoyatining holati o‘ta og‘ir bo‘lib, mamlakat hamda xalq manfaatlariga katta zarar yetkazgan”.

67 yoshli Van o‘z faoliyatini 1977 yilda boshlagan va 1986 yilda Xitoy Kommunistik partiyasiga a’zo bo‘lgan. U o‘nlab yillar davomida muxtor viloyatda turli lavozimlarda, jumladan Baotou merining o‘rinbosari va Xux-Xoto meri lavozimlarida ishlagan.

U 2018 yilning boshida mahalliy oliy qonun chiqaruvchi organ – viloyat xalq qurultoyi doimiy komissiyasi raisi o‘rinbosari bo‘ldi. 2024 yilning iyun oyida u partiya intizomi va milliy qonunlarni jiddiy buzganlikda gumon qilinib, tergovga tortilgan. Olti oy o‘tgach, u partiyadan chiqarib yuborildi.

Joriy yilning aprel oyida unga poraxo‘rlik ayblovi qo‘yilgan va sud ishni iyun oyida ochiq ko‘rgan.

Eslatib o‘tamiz, avvalroq Xitoyning Venchjou shahridagi O‘rta xalq sudi jinoiy guruhning 11 nafar a’zosini o‘limga hukm qilgandi. Guruh noqonuniy qimor o‘yinlarini tashkil qilish va 1,4 milliard dollardan ortiq pul aylanmasi bilan bog‘liq firibgarlik operatsiyalarini uyushtirganlikda, shuningdek, talabni bajarishdan bosh tortgan xodimlarni o‘ldirishda ayblangan.