Xitoy “Guanmu” sun’iy yo‘ldoshini orbitaga muvaffaqiyatli olib chiqdi 

Xitoy bugun, 5 noyabr kuni “Chanchjen-6” raketa tashuvchisi yordamida “Guanmu” tadqiqot sun’iy yo‘ldoshini orbitaga muvaffaqiyatli olib chiqdi. Bu haqda Xitoy koinot fanlari va texnologiyalari korporatsiyasi bayonotida aytilgan. 

Uchirish bugun, 5 noyabr kuni mahalliy vaqt bilan soat 10:19 da (Toshkent vaqti bilan 7:19) Xitoy shimolidagi Shansi provinsiyasidagi Tayyuan kosmodromidan amalga oshirilgan, sun’iy yo‘ldosh belgilangan orbitaga muvaffaqiyatli chiqqan va uchirish muvaffaqiyatli deb topilgan. 

“Guanmu” sun’iy yo‘ldoshi Xitoy Fanlar akademiyasi tomonidan ishlab chiqilgan va faqat Birlashgan Millatlar Tashkilotining 2030 yilgacha barqaror rivojlanish kun tartibi maqsadlariga xizmat qilishga bag‘ishlangan dunyodagi birinchi ilmiy sun’iy yo‘ldoshga aylangan. 

“Guanmu” sun’iy yo‘ldoshi inson va tabiat o‘rtasidagi o‘zaro munosabatlarni tavsiflovchi barqaror rivojlanish ko‘rsatkichlarini axborot bilan ta’minlash uchun inson faolligi yuqori bo‘lgan hududlarda energiya iste’moli miqdorini, aholi punktlari tuzilishi va qirg‘oq muhitini batafsil aniqlash imkoniyatiga ega bo‘ladi.