Xitoy dunyodagi eng yirik suzuvchi shamol turbinasini ishga tushirdi

Xitoy dunyodagi eng yirik suzuvchi shamol turbinasini yig‘di, uning qanotlari maydoni yettita futbol maydoniga teng. Bu haqda “South China Morning Post” nashri xabar berdi.

Qayd etilishicha, 16 megavatt quvvatga ega tizim Guansi-Chjuan avtonom tumanidagi Beyxay okrugida yig‘ilgan. Endi o‘rnatma 50 metrdan chuqurroq suv hududiga tortiladi, u yerda sinovdan o‘tkaziladi, tarmoqqa ulanadi va tijorat ekspluatatsiyasiga topshiriladi.

Barcha asosiy komponentlar, shu jumladan, torgich simlari, turbina reduktorlari va ballast boshqaruv tizimi Xitoyda ishlab chiqilgan va ishlab chiqarilgan. Bu darajadagi mahalliylashtirish mamlakatning uzoq muddatli energetik o‘tish va toza energiya rivojlanishi uchun muhim bo‘lgan texnologiyalik mustaqillikka intilishini ko‘rsatadi.

“South China Morning Post” ma’lumotlariga ko‘ra, turbina rotorining diametri 252 metrni tashkil qiladi. To‘liq quvvatga chiqqach, o‘rnatma yiliga taxminan 44,7 million kilovatt-soat elektr energiyasi ishlab chiqaradi, bu taxminan to‘rt mingta uy xo‘jaligini energiya bilan ta’minlashga yetadi.

Katta turbina yarim cho‘kib turuvchi platformaga o‘rnatilgan bo‘lib, Xitoydagi birinchi dinamik ballast tizimi bilan jihozlangan. Ushbu tizim shamol va to‘lqin kuchiga qarab, uchta ustunli rezervuarlar orasida suvni avtomatik ravishda oqizib, o‘rnatmaning barqarorligini tartibga soladi. Bunday moslashuv egilishni kamaytiradi, majburiy to‘xtash xavfini pasaytiradi va murakkab dengiz sharoitida ish samaradorligini oshiradi.

Eslatib o‘tamiz, avvalroq Xitoyning “China Eastern Airlines” aviakompaniyasi dunyodagi eng uzun to‘g‘ridan to‘g‘ri reys – Shanxay va Buenos-Ayresni bog‘laydigan yangi yo‘nalish uchun chiptalarni sotishni boshlagandi.