Xanchjou-2022. Musobaqada g‘olib va sovrindor bo‘lgan O‘zbekiston sportchilari qancha mukofot oladi?

Ayni kunlarda Xitoyning Xanchjou shahri mezbonligida XIX Osiyo o‘yinlari bo‘lib o‘tmoqda. Mazkur musobaqada o‘zbekistonlik sportchilar ham jami 22 ta medal jamg‘argan holda, umumiy reytingning 4-pog‘onasini band etib turibdi. 

Xo‘sh, bu musobaqada g‘olib va sovrindor bo‘lgan sportchilar O‘zbekistonda qanday mukofotlanadi? Bu savolning javobi Prezident Shavkat Mirziyoyevning 2022 yilda qabul qilingan tegishli qarorida keltirilgan. 

Unga ko‘ra, sportchilarga davlat byudjetidan asosiy hamda mahalliy byudjetdan quyidagicha qo‘shimcha pul mukofotlari beriladi.

Sportchilar:

• oltin medal uchun – 5 000 dollar hamda bunga qo‘shimcha 99 million so‘m;
• kumush medal uchun – 3 000 dollar hamda 66 million so‘m;
• bronza medal uchun – 2 000 dollar hamda 33 million so‘m.

Sportchilarini tayyorlagan trenerlarga:

• oltin medal uchun – 2 500 dollar hamda 66 million so‘m;
• kumush medal uchun – 1 500 dollar hamda 33 million so‘m;
• bronza medal uchun – 1 000 dollar hamda 16,5 million so‘m.

Sportchilarini tayyorlagan boshqa mutaxassislar (shifokor, diyetolog, massajist va boshqalar):

• oltin medal uchun – 2 000 dollar;
• kumush medal uchun – 1 000 dollar;
• bronza medal uchun – 500 dollar miqdorida har bir medal uchun bir martalik pul mukofotlari bilan rag‘batlantiriladi.

Biroq Prezidentning 2023 yil 8 apreldagi 114-sonli qarori bilan mukofot pullarining yangi miqdori tasdiqlangan, AQSH dollari ko‘rinishidagi mukofot miqdori 2 baravar oshirilgan. 

Ya’ni sportchilarga:

• oltin medal uchun – 10 000 dollar;
• kumush medal uchun – 5 000 dollar;
• bronza medal uchun – 2 500 dollar

Sportchilarini tayyorlagan trenerlarga:

• oltin medal uchun – 5 000 dollar;
• kumush medal uchun – 2 500 dollar;
• bronza medal uchun – 1 250 dollar miqdorida har bir medal uchun bir martalik pul mukofoti bilan rag‘batlantirilishi belgilangan. 

Ahamiyatlisi mazkur qarorda mahalliy byudjetdan qo‘shimcha mukofot, shuningdek, sportchilarini tayyorlagan boshqa mutaxassislar (shifokor, diyetolog, massajist va boshqalar)ni rag‘batlantirish haqida hech qanday gap yo‘q. Ajablanarlisi esa 2022 yilda qabul qilingan qaror ham o‘z kuchida turibdi, na bekor bo‘lgan, na o‘zgarish kiritilgan.