Xalqaro tanlovda g‘olib bo‘lgan o‘quvchilarning ota-onasi va ustoziga avtomobil sovg‘a qilindi (video)

Bugun, 20 yanvar kuni Abu-Dabi shahrida “Global o‘rta maktablar” nominatsiyasi bo‘yicha Shayx Zoid mukofoti sovrindori bo‘lgan Prezident maktabi ikki nafar o‘quvchisining ota-onasi va ustoziga O‘zbekiston Respublikasi Prezidenti nomidan avtomobil sovg‘a qilindi. Bu haqda Prezident yordamchisi Saida Mirziyoyeva o‘zining ijtimoiy tarmoqlardagi sahifasida ma’lum qildi.

"Bu g‘alaba barcha yoshlarimiz uchun umid va ilhom ramzidir. Biz Siz bilan faxrlanamiz!" deb yozdi Mirziyoyeva.

Mukofotlarni topshirish marosimida Prezident yordamchisi Saida Mirziyoyeva, Bosh vazir Abdulla Aripov va Maktabgacha va maktab ta’limi vaziri Hilola Umarova qatnashdi

Eslatib o‘tamiz, 14 yanvar kuni Toshkent shahridagi Prezident maktabi barqaror rivojlanish bo‘yicha Shayx Zoid Ol Nahayon nomidagi nufuzli mukofotning "Global o‘rta maktablar" nominatsiyasida g‘olib deb topilgandi. Mukofotni Birlashgan Arab Amirliklari Prezidenti Shayx Muhammad bin Zoid Ol Nahayon topshirdi. Abu-Dabidagi taqdirlash marosimida O‘zbekiston rahbari Shavkat Mirziyoyev ishtirok etdi. Prezident maktab vakillari bilan uchrashib, ularni g‘alaba bilan qizg‘in tabrikladi.