Qozog‘istondagi go‘sht bozorida “Sibir kuydirgisi” aniqlandi

Qozog‘istonning Atirau viloyatidagi eng yirik hisoblangan “Dina” bozoridagi chakana savdo ob’ektlarini tekshirish chog‘ida kuydirgi bakteriyasi aniqlandi. Bu haqda viloyat Sanitariya-epidemiologiya nazorati departamenti matbuot xizmati xabar berdi.

Qayd etilishicha, pichoqni yuvishda bakteriyalar topilgan. Go‘sht sotilgan pavilon vaqtincha yopilgan, joylarda dezinfeksiya tadbirlari olib borilmoqda.

Bo‘lim ma’lumotlariga ko‘ra, tezkor testlar patogen borligini tasdiqlagan. Shu tufayli laboratoriya tekshiruvlari natijalari olinmaguncha pavilon ishini to‘xtatishga qaror qilingan. Barcha zarur dezinfeksiya choralari sanitariya me’yorlariga muvofiq amalga oshiriladi. Pavilonda ishlayotgan yakka tartibdagi tadbirkorlar ro‘yxati shakllantirilib, ular 14 kun davomida shifokorlar nazoratida bo‘ladi.

“Avvalroq, sanitariya xizmati mutaxassislari tomonidan shahardagi 65 dan ortiq savdo ob’ektlari tekshiruvdan o‘tkazilib, 700 dan ortiq namunalar olingan bo‘lsa-da, takroriy ko‘rikdan so‘ng qo‘shimcha namunalar olinib, ular Milliy ekspertiza markazida tekshirilmoqda. Natijalar yaqin kunlarda ma’lum bo‘ladi”, deyilgan departament xabarida.

Atirau shahri aholisiga veterinariya nazoratidan o‘tgan go‘sht sotib olish, ovqatni kamida 70 daraja haroratda yaxshilab pishirish, xom go‘sht bilan aloqa qilgandan keyin qo‘l va asbob-uskunalarni yuvish, kelib chiqishi noma’lum go‘sht yoki yetarli darajada issiqlik bilan ishlov berilmagan mahsulotlarni iste’mol qilmaslik tavsiya etilgan.

“Sibir kuydirgisi odamdan odamga yuqmaydi, faqat hayvonlardan yoki ularning mahsulotlaridan yuqishi mumkinligini esga olish kerak”, deya ta’kidlagan boshqarma matbuot xizmati.

Eslatib o‘tamiz, avvalroq Qozog‘istonning Olmaota viloyatidagi Ulken Aksu qishlog‘i kuydirgi tufayli karantinga olingandi.