Qozog‘istonda ham O‘zbekiston sabab go‘sht narxi oshgani aytildi

Qozog‘iston Qishloq xo‘jaligi vaziri Aydarbek Saparov mamlakatda go‘sht narxining oshishini O‘zbekistondan bo‘layotgan yuqori talab bilan izohladi. Bu haqda u joriy yilning 11 fevral kuni brifing chog‘ida so‘z ochdi.

Brifing davomida vazirga narxlarning oshishi va fermerlarning bunday holatga o‘tgan yilgi qurg‘oqchilik sabab bo‘lgani haqidagi fikrlari yetkazilgan. Saparovning so‘zlariga ko‘ra, narxlarning o‘sishiga qurg‘oqchilik emas, balki Tojikiston va O‘zbekiston tomonidan yuqori talab sabab bo‘lgan.

“Bunga qurg‘oqchilik sabab emas. Qurg‘oqchilik avvalgi yil yozida bo‘lgandi, o‘tgan yili esa biz normal hosil oldik. O‘zingiz ham ko‘rib turibsiz, ikki yil oldin g‘alla qancha turardi va hozir qancha. Chorvachilik uchun yetarli yem bor. U juda arzon – taxminan 50 ming tenge. Shuning uchun qurg‘oqchilik go‘sht narxiga ta’sir qilmagan”, deydi vazir.

Saparovga ko‘ra, narxlarning oshishiga asosiy omil – Tojikiston va O‘zbekiston tomonidan go‘shtga bo‘lgan yuqori talab. Ushbu mamlakatlar Qozog‘istonda faol ravishda go‘sht sotib olmoqda, oqibatda vositachilar ham narxlarni oshira boshlagan. Ammo hozir vaziyat asta-sekin barqarorlashmoqda.

“Kecha o‘zim go‘sht yetkazib beruvchilar bilan gaplashdim. Narxlar kilogrammi uchun 2700 tengedan (70 ming so‘m) boshlab 3300 tengacha (86 ming so‘m) boradi, ba’zi joylarda 3500 (91 ming so‘m) tengegacha yetishi mumkin – bu qaysi go‘sht qismi ekanligiga bog‘liq. Lekin umuman olganda, go‘sht yetarli, hamma uchun yetadi. Narxlar bo‘yicha oldindan aniq prognoz berish qiyin, chunki bu savdo tarmoqlari bilan bog‘liq. Qishloq xo‘jaligi vazirligining vazifasi ishlab chiqarishni ta’minlash”, deydi Saparov.

Eslatib o‘tamiz, o‘tgan yil sentyabr oyida Qirg‘iziston bozorlarida go‘sht narxining keskin oshishi kuzatilgandi. Buning asosiy sabablaridan biri sifatida ham O‘zbekiston va Tojikistonga yetkazib berilayotgan go‘sht eksportining sezilarli darajada oshgani ko‘rsatilgan.