Qishloq xo‘jaligida QQSning “nol” stavkasi joriy etiladi

Qishloq xo‘jaligida QQSni hisoblashning soddalashtirilgan tartibi joriy etiladi. Bu haqda Prezidentning joriy yil 4 sentyabr kuni qabul qilingan “Qishloq xo‘jaligi sohasida qo‘shilgan qiymat solig‘ini hisoblashning soddalashtirilgan tartibini joriy etish chora-tadbirlari to‘g‘risida”gi farmonida so‘z boradi.

Qayd etilishicha, 2026-2027 yillarda qishloq xo‘jaligi sohasida rasmiy tovar aylanmasini kamida 3 baravar oshirish farmonni qabul qilishdan ko‘zlangan asosiy maqsad etib belgilangan.

Farmonga ko‘ra, 2026 yil 1 yanvardan:

• Qishloq xo‘jaligi tovar ishlab chiqaruvchilari tomonidan yetishtirilgan qishloq xo‘jaligi mahsulotlari realizatsiyasi uchun QQSning “nol” stavkasi joriy qilinadi;
• Qishloq xo‘jaligi tovar ishlab chiqaruvchilariga QQS summasi o‘rnini qoplash (qaytarish) 3 kunda avtomatlashtirilgan tarzda amalga oshiriladi.

Bundan tashqari, 2026 yil 1 yanvardan ishlab chiqilgan tovarlarni aynan 1 ta yetkazib berish zanjiri bo‘yicha QQS summasini hisobga olishda elektron hisobvaraq-fakturalarni xavf darajasiga qarab, real vaqt rejimida avtomatlashtirilgan tarzda tahlil qilish tizimi joriy qilinadi. 

Bunda yuqori xavf darajasiga ega elektron hisobvaraq-fakturalarning ulushi hisobot davrida rasmiylashtirilgan jami elektron hisobvaraq-fakturalar sonining 10 foizidan oshmasligi nazarda tutildi.

Eslatib o‘tamiz, avvalroq 2026 yil 1 yanvardan boshlab qishloq xo‘jaligi korxonalari dehqon va fermerlarga o‘zi yetishtirgan qishloq xo‘jaligi mahsulotini (g‘alla va paxtadan tashqari) sotishda qo‘shilgan qiymat solig‘i nol stavkada bo‘lishi xabar qilingan edi.