Qirg‘iziston Tojikiston bilan chegara muammosini hal qila oladimi?

Qirg‘iziston va Tojikiston vakillari mart oyida umumiy chegaradagi bahsli hududlar masalasi bo‘yicha muzokaralarning navbatdagi bosqichini o‘tkazadi. Bu haqda bugun, 7 mart kuni Qirg‘iziston Vazirlar Mahkamasi matbuot xizmati xabar berdi. 

“2023 yilning 10-16 mart kunlari Qirg‘iziston Respublikasi hukumat delegatsiyasi Dushanbe shahrida tojikistonlik hamkasblari bilan uchrashuv o‘tkazadi, unda ular davlat chegarasining umumiy uchastkasini delimitatsiya va demarkatsiya qilish masalalarini muhokama qiladilar”, deydi Vazirlar Mahkamasi vakili.  

Uning so‘zlariga ko‘ra, Tojikistonda bo‘lib o‘tadigan yig‘ilishda Qirg‘iziston ishchi guruhi tarkibiga Vazirlar Mahkamasining chegara masalalari bo‘yicha maxsus vakili Nazirbek Bo‘ruboyev boshchiligidagi 15 kishi kiradi. 

Qirg‘iziston va Tojikiston o‘rtasidagi davlat chegarasining uzunligi qariyb 980 km. 2002 yilning dekabr oyidan buyon uning delimitatsiyasi bo‘yicha muzokaralar davom etmoqda. 2017 yildan beri Dushanbe va Bishkek bu jarayonni sezilarli darajada kuchaytirdi. Hozirgi vaqtda chegara o‘tish chizig‘ining uchdan ikki qismidan ko‘prog‘i aniqlangan va davlatlar tomonidan o‘zaro tan olingan, qolgan uchastkalari bahsli hisoblanadi. 

Ushbu muammoning hal bo‘lmagani ikki respublikaning mahalliy aholisi va harbiy xizmatchilari o‘rtasida, shu jumladan o‘qotar quroldan foydalanish bilan bog‘liq nizolarga bir necha bor sabab bo‘lgan. Ularning oxirgisi 2022 yil kuzining boshida sodir bo‘lgan, Qirg‘iziston tomonida to‘qnashuvlar chog‘ida 60 dan ortiq odam halok bo‘lgan. Qirg‘iziston Qozog‘iston, Xitoy, O‘zbekiston va Tojikiston bilan chegaradosh. Hozircha demarkatsiya va delimitatsiya jarayonini faqat Tojikiston tomoni bilan yakunlab bo‘lmadi.