Qatar stadionlarida pivo sotish taqiqlandi

Qatar hukumati jahon chempionati boshlanishiga ikki kun qolganda stadionlarda pivo sotishni taqiqladi. Bu haqda BBC xabar berdi.

“Mezbon davlat hokimiyati va FIFA o‘rtasidagi muzokaralardan so‘ng chempionat stadionlaridan pivo savdo nuqtalarini olib tashlash va litsenziyalangan joylarga alkogolli ichimliklar savdosini yo‘naltirish to‘g‘risida qaror qabul qilindi”, deyiladi FIFA rahbariyatining bayonotida.

Avvalroq, jahon chempionati tashkilotchilari ba’zi spirtli ichimliklar faqat stadion oldidagi maxsus joylarda, o‘yindan 3 soat oldin va o‘yin tugagandan 1 soat keyin sotilishiga ruxsat berilishi haqida xabar tarqalgan edi.

Ma’lumot uchun, Qatar jamoat joylarida spirtli ichimliklar iste’mol qilishni qonun bilan taqiqlagan.

Eslatib o‘tamiz, jahon chempionati o‘yinlari 20 noyabrdan 18 dekabrga qadar 5 ta shaharda joylashgan 8 ta stadionda o‘tkaziladi. Shuningdek, Qatardagi JCH tarixdagi eng qimmat futbol musobaqasiga aylangani haqida xabar berilgan edi.

Ozoda Choriyeva