Qatar shayxi “Manchester Yunayted”ni sotib olish taklifi bilan chiqdi

Qatar shayxi Jassim Bin Hamad al-Taniy kecha, 17 fevral kuni “Manchester Yunayted”ni sotib olish uchun 5 milliard funt sterling (taxminan 6 mlrd dollar)gacha bo‘lgan taklif bilan chiqqani ma’lum bo‘ldi. Bu haqda “The Sun” nashri xabar berdi.

Shayx Jassim o‘zining rasmiy murojaatini “Manchester Yunayted”ning takliflar bo‘yicha nazoratchilari - AQSHda joylashgan “Raine Group” kompaniyasiga bildirgan. Bayonotda Shayx Jassim klubni maydonda ham, undan tashqarida ham avvalgi shon-shuhratiga qaytarishni rejalashtirgani keltirib o‘tilgan. U, shuningdek, klubni to‘liq qarzdorlik holatidan olib chiqishga va’da bergan. Shayx Jassim “Nine Two” jamg‘armasi orqali mashg‘ulotlar markazi, stadion va infratuzilmaga ham sarmoya kiritish niyatida.

Ma’lumot o‘rnida, 5 milliard funt sterling miqdoridagi har qanday kelishuv sport jamoasi uchun rekord narx bo‘lsada, klubning amaldagi egasi Gleyzerlar oilasi klubni 6 milliard funt sterlingga baholagan.