Qashqadaryoda departamentning bo‘lim boshlig‘i YTHga uchradi

Qashqadaryo viloyatida Iqtisodiy jinoyatlarga qarshi kurashish departamentining Dehqonobod tuman bo‘limi boshlig‘i mashina boshqaruvi jarayonida yo‘l-transport hodisasiga uchradi. Bu haqda Bosh prokuratura huzuridagi departament Matbuot xizmati xabar berdi.

Qayd etilishicha, joriy yilning 20 iyun kuni soat 16:10 lar atrofida Qashqadaryo viloyati Dehqonobod tumani Iqtisodiy jinoyatlarga qarshi kurashish departamentining Dehqonobod tuman bo‘limi boshlig‘i B.G‘. o‘ziga biriktirilgan Nexia-3 rusumli xizmat mashina vositasida harakatlanib kelayotgan vaqtida qarama-qarshi yo‘nalishdagi fuqaro Sh.F. boshqaruvidagi Sobalt rusumli mashina bilan to‘qnashib ketgan. Shuningdek orqa tomondan harakatlanib kelayotgan fuqaro U.Yo. boshqaruvidagi Spark rusumli mashina vositasi ham B.G‘. boshqaruvidagi Nexia-3 mashinasiga kelib urilgan.

“Mazkur holat yuzasidan tegishli sud-tibbiyot ekspertizalari hamda departament xodimiga nisbatan xizmat tekshiruvi tayinlanib, Qashqadaryo viloyat prokuraturasi tomonidan tergovga qadar tekshiruv harakatlari o‘tkazilmoqda. Ekspertiza hamda xizmat tekshiruvi natijasiga ko‘ra qo‘shimcha axborot beriladi”, deyiladi xabarda.