Isroilning G‘azoga hujumi oqibatida halok bo‘lganlar 7,7 mingga yetdi

Isroil G‘azoga hujumlari oqibatida halok bo‘lganlar soni so‘nggi 24 soat ichida 377 nafarga ko‘payib, 7703 kishiga yetdi. Bu haqda G‘azo sektori Sog‘liqni saqlash vazirligining rasmiy vakili Ashraf al-Qudra ma’lum qildi.

Vazirlik vakilining so‘zlariga ko‘ra, Isroil bir kunda 53 ta qirg‘in sodir etgan.

“Isroil hujumlari oqibatida 3195 nafar bola va 1863 nafar ayol halok bo‘ldi. G‘azo sektorining yana 19 743 nafar aholisi jarohat oldi”, deydi u.

Ma’lum qilinishicha, kecha, 27 oktyabr oqshomidan boshlab Isroil blokadadagi G‘azo sektoriga, asosan, eksklavning shimoliy qismiga hujumlarini kuchaytirgan.

Eslatib o‘tamiz, kecha, 27 oktyabr kuni kechqurun Isroil blokada qilingan G‘azo sektorining shimolidagi 150 ta nishonga zarba bergandi. Shu kuni Isroil harbiylari G‘azo sektori shimoliga kirib, quruqlikdagi amaliyotlarini boshladi. Isroil Mudofaa vaziri Yoav Galant mamlakat armiyasi G‘azo sektoridagi operatsiyaning bir bosqichini yakunlab, keyingi buyruqlargacha davom etadigan yangi bosqichga o‘tganini ma’lum qildi.